Respýblıkalyq bıýdjetten bólingen alǵashqy transh 70 mlrd teńge korporasııanyń shotyna túsken. Qarjylandyrýdyń kóp bóligi 5,8 mlrd teńge nesıe seriktestikteri arqyly berilgen. Mıkroqarjy uıymdary arqyly fermerler 800 mln teńge rásimdedi. Bıyl nesıe alýdy jeńildetý jáne jedeldetý maqsatynda Agrarlyq nesıe korporasııasy qarjylandyrýdy tek nesıe seriktestikteri, ekinshi deńgeıdegi bankter jáne mıkroqarjy uıymdaryn qorlandyrý arqyly júzege asyryp jatyr. Nesıe qarajaty qarjy uıymdaryna 1,5 paıyz jyldyq syıaqy mólsherlemesimen jáne 1,5 paıyzdan bastalatyn jyldyq tıimdi syıaqy mólsherlemesimen beriledi. Al qarjy uıymdary sharýashylyqtarǵa nesıeni jyldyq 5 paıyzǵa deıingi syıaqy mólsherlemesimen rásimdeıdi.
«Bul qarajat janar-jaǵarmaı, aýyl sharýashylyǵy tehnıkasyn jóndeýge qajetti qosalqy bólshekter, mıneraldy tyńaıtqysh, tuqym satyp alýǵa jáne egin egý men jınaýǵa arnalǵan ózge de is-sharalarǵa jumsalýǵa tıis. 2022 jyldan bastap baǵdarlama sharttary boıynsha alǵash ret nesıeleý merzimi kelesi jyl kókteminiń basyna deıin uzartyldy. Buryn nesıeleý merzimi qarjylandyrý jylymen shektelgen edi», dep habarlaıdy «Báıterek» holdıngi.
Sonymen qatar ońtústik aımaqtar alǵash ret ótken jyldardaǵydaı sáýir aıynda emes, aldyn ala, ıaǵnı byltyr jeltoqsanda qarjylandyryldy. Sondaı-aq 1 gektarǵa jumsalatyn shyǵystar normatıviniń mólsheri orta eseppen 25 paıyzǵa kóbeıtilgen.
«Báıterek» ulttyq Basqarýshy holdıngi» AQ basqarma tóraǵasynyń birinshi orynbasary Nurbolat Aıdapkelovtiń aıtýynsha, 2022 jyly aýyl sharýashylyǵy 9 paıyzǵa ósim kórsetti. Onyń aldynda ortasha ósý qarqyny 3-4 paıyz bolǵan.
«Geosaıası oqıǵalarǵa jáne olardyń saldaryna qaramastan ónerkásip ósip otyr. Buǵan ósimdik sharýashylyǵy aıtarlyqtaı úles qosty. Máselen, dándi jáne dándi-burshaqty daqyldar ónimi 39 paıyzǵa – 22,8 mln tonnaǵa deıin artty, onyń ishinde bıdaı 44 paıyzǵa – 17 mln tonnaǵa deıin artty. Maıly daqyldardyń ónimi shamamen 17 paıyzǵa – 2,8 mln tonnaǵa deıin, kókónister 4 paıyzǵa – 4,9 mln tonnaǵa deıin artty. Mal sharýashylyǵyna da kórsetkishter ósti. Iri qara mal basy 2,5 paıyzǵa – 8,4 mln basqa, qoı 2,2 paıyzǵa – 19 mln basqa, qus 3,8 paıyzǵa – 49,5 mln basqa deıin ósti. Bul derekterge qarasaq, aýyl sharýashylyǵy syrtqy daǵdarystarǵa tótep bere alatynyn jáne ári qaraı damý úshin negizi myqty ekenin kórsetti», deıdi ol.
Úkimet basshysy Álıhan Smaıylovtyń aıtýynsha, bıyl egis jumystaryna 413 myń tonna dızel otyny qajet.
«Bul ótken jyly bólingen kólemnen 13 myń tonnaǵa kóp. Qazirgi ýaqytta oblystardy munaı óńdeý zaýyttaryna bekitý kestesiniń jobasyn ázirleý, sondaı-aq egis jumystaryna josparlanatyn dızel otynynyń kólemi men baǵasyn kelisý júrgizilip jatyr. Kóktemgi naýqandy tehnıkalyq qamtamasyz etý bóliginde aýyl sharýashylyǵy qurylymdarynda 141,7 myń traktor, 4 300 birlik joǵary ónimdi egis kesheni, 73,2 myń sepkish, 221,2 myń topyraq óńdeý mashınasy bar», dedi Premer-mınıstr depýtat saýalyna bergen jaýabynda.
