Sıfrlyq jobalar ıgiligi

Mundaı jobalardyń biri – «E-zań kómegi». Joba advo­kat­tar­dyń, zań keńesshileriniń qyz­metin, olardyń úderiske qa­tysýshylarmen jáne basqa da múddeli taraptarmen onlaın rejimdegi ózara is-qımylyn av­to­mattandyrýǵa baǵyttalǵan. Atalǵan júıede qylmystyq sot isin júrgizýdiń sotqa deıingi satysynda memleket kepildik bergen zań kómeginiń úderisteri avto­mattandyrylǵan. Ol úshin Bas prokýratýranyń «E-qylmystyq isimen» tıisti ıntegrasııalar jasalǵan.

– Biz azamattar men advokat­tarǵa kómektesetin aqparattyq júıe ázirledik. Bul kómek kór­setilýge tıis adamdarǵa qandaı advokat nendeı kómek kórsetkenin tirkeıtin júıe. Sondaı-aq qazir zań keńesshileri degen uǵym bar. Osy jyldyń birinshi toqsanynda bul júıeni mobıldi qosymsha arqyly keńes alýǵa bolatyndaı etip jetildiremiz. Avtorızasııa men qol qoıý úderisteri Face ID arqyly jasalǵanyn qalaımyz, – deıdi Ádilet vıse-mınıstri Bekbolat Moldabekov.

Onyń aıtýynsha, azamat bel­gili bir advokatty nemese zań keńesshisin tańdarda advo­kat­tardyń, zań keńesshileriniń reı­tıngine nazar aýdara alady. Sondaı-aq azamattar 1414 baı­lanys ortalyǵy arqyly da zańgerlik keńes ala alatynyn umyt­paıyq.

Digital Justice jobalarynyń biri «MIB-ti sıfrlandyrý» dep atalady. Atalǵan qanatqaqty jobany 2023 jyldyń birinshi toqsanynda iske qosý josparlanyp otyr. Joba turǵyndardyń qoltańbalaryn jınaý úderisin avtomattandyrýǵa, daýystardy, kvorýmdy avtomatty túrde sa­naýǵa, keıinnen múlik ıeleri bir­lestigin tirkeý úshin elektrondy hattamany qalyptastyrýǵa múmkindik beredi.

– MIB tóraǵasyn tirkeý onlaın rejimde júrgiziledi. Azamattar mobıldi qosymsha arqyly ózderine yńǵaıly jolmen, ıaǵnı bıometrııa nemese elek­trondy sıfrlyq qoltańba (ESQ) arqyly qol qoıady, – dep naqtylady vıse-mınıstr.

Sol sekildi advokat nemese notarıýs lısenzııasyn alý úderisi de sıfrlandyrylady. Bul qyzmetter «Attestattaý reın­jınırıngi» jobasy aıasynda múmkin bolmaq. Osynyń nátıjesinde aýmaqtyq ádilet organdarynda komıssııamen betpe-bet áńgimelesý alynyp tastalady. Onyń ornyna kompıýterlik testileýden jáne sıtýasııalyq keısterden ótý qarastyrylǵan. Qanatqaqty jobany osy jyldyń birinshi toqsanynyń sońynda iske qosý josparlanǵan.

– Qazir advokat, notarıýs, sot sarapshysy nemese jeke sot oryndaýshysy lısenzııasyn alý úshin birneshe kezeńnen ótedi. Onyń ústine nátıje teris bolǵan jaǵdaıda, kem degende úsh aıdan keıin ekinshi ret tapsyrýǵa múmkindik alady. Bul úderis tolyǵymen sıfrlandyrylmaq. Taǵylymdamadan keıin birden kom­pıýterde onlaın test, keıs suraqtaryna qatysty synaq tap­syrýǵa jáne birden lısenzııa alýǵa múmkindik beredi. Eger azamat testti tapsyra almasa, onda bir aptadan keıin ekinshi múm­kindik usynylady, – dedi B.Mol­dabekov.

Qazirgi ýaqytta 53 memlekettik qyzmettiń jartysynan kóbin egov Mobile mobıldi qosymshasy ar­qyly alýǵa bolady. Iаǵnı 28 mem­lekettik qyzmet, 13 servıs jáne 5 sıfrlyq qujat qoljetimdi. Osy oraıda egov.kz saıtynda barlyq qyzmet elektrondyq formatqa kóshirilgenin atap ótken jón.

– Ádilet mınıstrligi muny­men shektelmeı memleket­tik qyz­metterdi mobıldi qosym­sha­larǵa kóshirý jumystaryn júrgizip jatyr. Búginde birqatar qyzmet bankterdiń mobıldi qosymshalarynda qol­jetimdi ekenin atap ótken jón. Máselen, Halyk Homebank arqyly ne­keni tirkeý, Bereke Bank-tiń B-Business mobıldi qosymshasy arqyly jaýapkershiligi shekteýli serik­testikti tirkeý, Kaspi.kz jáne Halyk Homebank arqyly balanyń týý týraly kýáligin alý, Halyk Homebank arqyly zańdy tulǵalar men jyljymaıtyn múlik týraly málimetter alý qyzmetteri qolje­timdi. Osy baǵyttaǵy jumys jal­ǵasatyn bolady, – dedi ol.

B.Moldabekovtiń aıtýynsha, memlekettik qyzmetter pro­aktıvti jáne kompozıttik formatta kórsetiledi. Qazirgi ýaqytta ata-anasynyń kelisimi boıynsha bala týǵannan keıin bir táýlik ótken soń kýálik berýdi kózdeıtin balanyń týýyn tirkeý, jyljymaıtyn múlik ıesiniń mekenjaıyn avtomatty túrde ózgertý qyzmetteri proaktıvti formatta qoljetimdi.

– Sol sekildi jańa jyljymaıtyn múlik ıelerine kommýnaldyq qyzmettermen sharttar jasasý tártibi ońtaılandyryldy. Kom­pozıttik formatta Blockchain teh­nologııasyn qoldana otyryp, banktik kepil jáne satyp alý-satý sharttaryn tirkeý, Otbasy bankiniń www.gosreestr.kz saıty arqyly jalǵa beriletin turǵyn úıdi sýbsıdııalaý, turǵyn úılerdi jekeshelendirýdiń elektrondyq sharttaryn resimdeý qoljetimdi. Sondaı-aq atqarýshylyq is júr­gizý organdarynyń avtomattan­dyrylǵan aqparattyq júıesin bankterdiń aqparattyq júıesimen ın­tegrasııalaýdy tırajdaý ju­mys­tary júrgizilýde, – dedi vıse-mınıstr.