Eske salsaq, byltyr atalǵan óner ujymynda «Art-sport» portalynyń qyzmeti sheńberinde «keskindeme», «quraq quraý», «kıim úlgileý, pishý jáne tigý», «aǵashqa órnek salý» sekildi túrli baǵyttarda balalarǵa arnalǵan shyǵarmashylyq úıirmeler ashylǵan bolatyn. Ártúrli jastaǵy oqýshylar bilikti ustazdar ótkizetin sabaqtarǵa qýana qatysyp, teatrdyń atmosferasyn sezinip júr. Tipti keıbireýi qolónershi-ustazdarynyń isin jalǵastyrýdy uıǵarǵan. Osynaý ýaqyt ishinde balalar óz jumystary qoıylǵan birneshe kórmege qatysty.
– Qyzym «Art-sport» baǵdarlamasy aıasynda «Kıim úlgileý, pishý jáne tigý» seksııasyna bir jyldan astam ýaqyt baryp júr. Ol sabaqtarǵa úıirme ashylǵan boıda qatysa bastady, sondyqtan biz oqýdy bastaý úshin ujymnyń, materıaldyq bazanyń qalaı daıyndalǵanyn bilemiz. Barlyǵy joǵary deńgeıde boldy. Balalar jańa tigin quralymen jabdyqtalǵan keń ári jaryq kabınette daıyndalady. Pishý men tigýge qajetti zattarmen teatr qamtamasyz etedi. Balalar tigin mashınasymen, torlaǵyshpen jumys isteýdi, qolmen tigý tehnıkasyn meńgerdi. Úıde ózderi jasaǵan oıynshyqtar, buıymdar toptamasy kóbeıip keledi, azdap kıim-keshek te tigedi, – dedi Úmit Maǵzumova.
Budan bólek úıirmege qatysýshylar opera men balet spektaklderine daıyndyq barysyn, ártisterdiń grım jasaıtyn, kıinetin bólmelerin kórip, kostıýmderdiń tarıhymen tanysady.
Byltyr memlekettik shyǵarmashylyq jáne sporttyq tapsyrystardy jan basyna qarjylandyrý platformasy teatrda balalarmen jumysty aıtarlyqtaı keńeıtýge múmkindik berdi.
– Buryn «Astana Operada» balet jáne hor stýdııasy bolatyn, qazir teatrlyq qolóner belsendi damyp keledi. Bul úıirmeler balalarǵa óte qyzyqty. Osy oraıda biz toptardyń sanyn kóbeıtip jatyrmyz. Kommersııalyq toptar qosyp, eresekterge arnalǵan sándik-qoldanbaly óner seksııalaryn ashýdamyz, – dedi stýdııa jetekshisi Nazym Jaı- laýbaeva. – Shyǵarmashylyq turǵyda ózin-ózi tanytý balalar men jasóspirimderge ǵana mańyzdy emes, bul eresekterge de qajet. Sondyqtan biz óz áleýetterin júzege asyrýǵa, kúndelikti sharýalardan basqa dúnıege kóńil bólip, bos ýaqytty qyzyqty ári paıdaly etip ótkizýge múmkindik berýge daıynbyz.
«Kıim úlgileý, pishý jáne tigý» seksııasynda sabaqtardy «Astana Operanyń» tigin sehynda jumys isteıtin tájirıbeli teatr kostıýmderin pishýshi-sánger Aıgúl Ryspaeva júrgizedi. Aǵashqa órnek salýdy jıyrma jyldyq tájirıbesi bar sýretshi-býtafor Erzat Elshibaev úıretedi.
– Aǵashqa órnek salý – sándik-qoldanbaly óner túri, ol aǵashty kórkemdik óńdeýdiń san alýan túrlerin, onyń ishinde aramen kesýdi, joný isin, kúıdirýdi qamtıdy, – deıdi Erzat Elshibaev. – Bul daǵdylardy úırený asa qıyn emes. Bizdiń ıeligimizde bildekter, arnaıy qural-saımandar bar, olardyń kómegimen úıdiń ishin bezendirýge arnalǵan zergerlik elementterdi jasaýǵa, shyǵarmashylyq shabytty júzege asyrýǵa jáne qyzyqty jumys barysynan rahat alýǵa bolady.
Aıta keteıik, eresekterge arnalǵan qolónerdi úırený múmkindigi úshin barlyq baılanys málimeti teatr saıtynda kórsetilgen.
