Bul týraly Premer-mınıstr Álıhan Smaıylovtyń tóraǵalyǵymen ótken Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtyp berdi. Vedomstvo basshysy sý tasqynyna qarsy is-sharalardy ýaqtyly qamtamasyz etý úshin barlyq qaýipti ýchaskede táýliktik kezekshilik pen kúndelikti baqylaý júrgizilip kele jatqanyn jetkizdi. Qajetti jumystardy jedel uıymdastyryp, tasqyn qaýpin aldyn alý maqsatynda qajetti ınertti jáne basqa da materıal tolyq kólemde daıyndalǵan. Atap aıtqanda, 20 myń tekshe metr qum, 6 myń tekshe metr shoıtas, 8 myń tekshe metr qıyrshyq tas, sondaı-aq 18 myń tekshe metr qum-qıyrshyq tas qospasy ázirlengen.
«Qazir elimizdiń ońtústik óńirlerindegi barlyq sý ótkizý qubyry tasqyn men erigen sýdyń qalypty ótýin qamtamasyz etip keledi. Soltústik óńirlerde aýa raıy jaǵdaıyna baılanysty sý ótkizý qubyrlarynyń sańylaýlaryn ashyp, qardan tazartý jumystary júzege asyrylyp jatyr», dedi M.Qarabaev.
Sondaı-aq avtojoldardyń kútimin saqtap, kólik qozǵalysynyń qaýipsizdigin qamtamasyz etý úshin jol ınfraqurylymy arqyly tasqyn jáne erigen sýlardyń kedergisiz ótýine baılanysty jedel sharalar qabyldanady. Osy oraıda sý tasqynyna qarsy baǵyttalǵan jumystardy qarjylandyrý joldardy kútip ustaýǵa bólingen qarajattyń esebinen júzege asyrý kózdelgenin atap ótken jón.
Aıta keteıik, sý tasqyny kezeńi bastalǵaly beri respýblıkalyq jeli boıynsha joldyń shaıylyp ketýine baılanysty jaǵdaı Jambyl oblysynda baıqalǵan. Naqtyraq aıtsaq, erigen sýdyń shamadan tys jınalýynyń saldarynan 22-shi aqpanda Býrylbaıtal jáne Aqsúıek eldi mekenderiniń arasyndaǵy ýchaskeniń 3 jerinde aınalma jol shaıylyp ketip, kólik qatynasy Almaty – Qaınar – Shý – Býrylbaıtal baǵyty arqyly iske asyryldy. Merdiger uıym qalpyna keltirý jumystaryn jedel júrgizdi.
Temirjol kóliginiń qozǵalysyna kelsek, «Qazaqstan temir joly» ulttyq kompanııasy sý tasqyny kezeńinde shoıyn jol men jasandy qurylystardy saqtap, sonymen qatar poıyzdardyń úzdiksiz qatynaýyn qamtamasyz etýge arnalǵan tehnıkalyq-uıymdastyrý is-sharalaryn bekitti.
Marat Kárimjanulynyń aıtýynsha, aldyńǵy jyldardyń tájirıbesine taldaý jasalyp, barlyq óńirde tasqyn sýdy ótkizý boıynsha qaýipti oryndardyń tizbesi anyqtalyp otyr.
«Kóktemgi sý tasqyny kezeńinde táýliktik kezekshilik pen qaýipti oryndarǵa baqylaý júrgiziledi. Tutastaı alǵanda, 3 578 kópirdi, 6 myńnan asa sý ótkizý qubyryn, taýly aryqtardy jáne jol jyralaryn qar men muzdan tazartý jumystary bastaldy. Elimiz boıynsha shoıtas pen relsti paketter jáne kondısııasyz temirbetondy shpaldarmen jaraqtalǵan tasqynǵa qarsy 45 poıyz jasaqtalyp jatyr», dedi IIDM basshysy.
