Talantty jastarmen qaıta jasaqtalǵan shyǵarmashylyq ujym kúni keshe ǵana tusaýkeser-konsertin ótkizdi. Sahnada – jańa esimder, jańa ún, zamanaýı stıl, ózgeshe obraz. Qazaq óneriniń tarıhynda túren salǵan áıgili ansambldiń jańa quramy mádenı sabaqtastyqty jalǵaı alatyndaryn dáleldedi. Aıtýly keshke «Gúlderdiń» barsha kórermeni men Premer-mınıstrdiń orynbasary Altaı Kólginov, Mádenıet jáne sport mınıstri Ashat Oralov, Eńbek jáne halyqty áleýmettik qorǵaý mınıstri Tamara Dúısenova qatysty.
Búginde qaıta búr jarǵan «Gúlderdiń» ulan-ǵaıyr qazaq dalasynyń ár túkpirine taraǵan ataq-abyroıy ámbege aıan. О́z ýaqytynda qoǵamdy dúr silkindirgen shyǵarmashylyq ujymy Qytaı, Úndistan, Germanııa, Japonııa, Kýba, Bolgarııa, Mońǵolııa, Izraıl, Ońtústik-Shyǵys Azııa memleketterine gastroldik saparlarǵa shyǵyp, ult ónerine tánti etken edi. Tarıhty paraqtasaq, ansambl alǵashynda 71 adamnan quralypty. Sara Tynyshtyǵulova, Roza Rymbaeva, Qapash Qulysheva, Qaırat Baıbosynov, Aıjan Nurmaǵambetova, Maqpal Júnisova, Naǵıma Esqalıeva, Maıra Núrkenova, Sembek Jumaǵalıev, Jeńis Ysqaqova, Baqyt Shadaeva basqa da ártister osy ansamblden shıryǵyp shyqty.
«Gúlder» ansamblin jańǵyrtý jobasyn júzege asyrý maqsatynda ujymǵa shyǵarmashylyq oqý oryndarynyń túlekteri alyndy. Tájirıbeli tálimgerler – bas baletmeıster Anvara Sadyqova men jobanyń kórkemdik jetekshisi ári dırıjeri Serik Dáýletov shaqyrylǵan. Dál osy jyldyń maýsym jáne shilde aılarynda ansambldiń quramyna ónerpazdardy qabyldaý úshin tálimgerler Qazaqstannyń birqatar qalasynda kastıng júrgizdi. Keıin ujymnyń jańasha baǵyttaǵy qyzý daıyndyq jumystary bastalyp ketti. Ansambldiń burynǵy quramynda óner kórsetken talantty ánshiler men kásibı bıshiler arnaıy shaqyrylyp, repertýary jańa mýzykalyq shyǵarmalarmen jańartylǵan. Máselen, óner ujymynyń brendine aınalǵan «Bıpyl» (horeografııasy D.Qııaqovanyń), «Asataıaq» (horeografııasy Z.Raıbaevtyń), «Malaızııa bıi» (horeografııasy G.Izmaılovanyń) jáne basqa da bıler horeograf Tatıana Aýtalıpovanyń qatysýymen júrgizilse, jańa horeografııalyq kompozısııalardy Gúlnár Saıtova, Karına Haıtmatova, Gúlden Fatkýlla, Evgenıı Moıseev, Karına Jırenbaeva, Móldir Nyǵymet syndy horeograftar qoıdy. Qazir qaıta jasaqtalǵan ansambldiń quramynda 15 bıshi men 9 mýzykant bar.
Aıta keteıik, qazir «Roza Baǵlanova atyndaǵy «Qazaqkonsert» memlekettik konserttik uıymynyń basty maqsattarynyń biri – osy ansambldi jańa qurammen kórermenge tanystyrý bolyp otyr. Sondyqtan bıyl jalpy atalǵan uıymǵa qarasty shyǵarmashylyq ujymdarǵa 5 halyqaralyq jáne 3 respýblıkalyq, 8 baǵyttaǵy shet memleketke jáne 5 baǵyt boıynsha respýblıkalyq gastroldik sapar josparlanyp otyr. Soǵan saı «Gúlder» de Ońtústik Koreıa, Fransııa, Belgııa, Vengrııa, Qyrǵyzstan, О́zbekstan jáne basqa da elderde óner kórsetedi. Al endigi konsert Almaty qalasynda ótpek.
Ańyz-ansambldiń jańa tolqynyn daıyndaý jumystary da ońaı bolǵan joq. «Gúlderdiń» burynǵy vıdeoqujattary saqtalǵanymen, arhıvtik qujattardy aqtaryp otyryp, sol kezderdegi qazaq bı ónerinde qoldanylǵan qımyl-qozǵalystary men bı túrlerine qatysty qundy málimetter tabylmaǵan. Sol sebepten ansambldiń basy-qasynda júrgen shyǵarmashylyq topqa osy baǵytta da kóp eńbek etýge týra keldi.
Jańa jobaǵa daıyndyq kezinde ansambldiń muraǵattyq materıaldary muqııat zerdelenip, toptyń «Altyn qorynan» eń úzdik nómirler iriktelip alyndy. Aıtýly keshke ansambldiń alǵashqy solısteriniń biri, Qazaqstannyń halyq ártisi Roza Rymbaeva, Klara Tólenbaeva, jas ánshiler Mádı Syzdyqov, Zarına Bojakova, Dıdar Ábdihalyq, Saltanat Meńdiǵalıeva, «Turan» folklorly-etnografııalyq ansambli men «Steppe Sons» alternatıv-folk toby qatysty.
«Gúlderdiń» oryndaýynda «Bıpyl», «Asataıaq», «Malaızııa», «Horezm», sondaı-aq mýzykalyq kompozısııalarǵa arnalǵan túrli baǵyttaǵy bıleri usynyldy. Án men bı kezek órilgen kesh barysynda áıgili ujymnyń tarıhynan syr shertetin vıdeofılmder kórsetildi. Oǵan qosa ansambldiń burynǵy ónerpazdary ekran arqyly ystyq estelikterimen bólisip, jańa quramǵa – jas talanttarǵa sáttilik tiledi.
