Elorda • 18 Naýryz, 2023

Elordada II Elızaveta patshaıymnyń qurmetine saıabaq ashyldy

Astanada Ulybrıtanııa patshaıymy II Elızavetanyń qurmetine saıabaq ashyldy. Saltanatty sharaǵa Ulybrıtanııanyń syrtqy ister mınıstri Djeıms Kleverlı qatysty, dep habarlaıdy Egemen.kz.

Aıana TOǴANBEK

«II Elızaveta patshaıymnyń qurmetine skverdi saltanatty ashý sharasyna qosh keldińizder! Patshaıym Ulybrıtanııa tarıhynda eń uzaq, 70 jyl boıy basqarǵan, asa mártebeli kórnekti kóshbasshy, dana bıleýshi jáne brıtan halqynyń birligi men tabandylyǵynyń sımvoly retinde este qaldy. Onyń abyroıy, qadir-qasıeti jáne keremet jetistikteri álemdegi mıllıondaǵan adamdardy shabyttandyrady. Qazaqstanda II Elızaveta laıyqty súıispenshilik pen qurmetke ıe», dedi QR Syrtqy ister mınıstriniń orynbasary Roman Vasılenko skverdiń ashylý saltanatynda.

Onyń aıtýynsha, elorda gúlzarlarynyń birine mártebeli patshaıymnyń esimin berý týraly sheshimdi Memleket basshysy Qasym-Jomart Toqaev tikeleı ózi qabyldady. Atalǵan syı II Elızavetanyń mereıtoıyna oraı uıymdastyryldy.

«О́kinishke qaraı, II Elızaveta patshaıym Qazaqstanda bolyp úlgermedi. Osy oraıda, III Charlz korol jáne korol otbasynyń basqa da músheleri bizdiń elge keledi dep úmittenemiz. Ulybrıtanııamen yntymaqtastyq Qazaqstannyń syrtqy saıasatynda basym oryn alatynyn atap ótkim keledi. Eki el arasyndaǵy dıplomatııalyq qatynastyń 30 jyldan astam ýaqyty ishinde saıası, saýda-ekonomıkalyq, ınvestısııalyq, mádenı-gýmanıtarlyq sala boıynsha strategııalyq áriptestik joǵary deńgeıge jetti», dedi mınıstrdiń orynbasary.

Sondaı-aq R.Vasılenko Ulybrıtanııanyń Syrtqy ister mınıstri Djeıms Kleverlıdiń elimizge sapary qazaq-brıtan qarym-qatynasynyń odan ári jan-jaqty damýyna qýatty serpin beretinine senim artty.