Biraq saılaý barysynda anyqtalǵan keıbir kózge túsken nárse – kóptegen kandıdattyń óz baǵdarlamalaryn jetkilikti deńgeıde nasıhattaı almady. Aqparattyń saılaýshylarǵa tolyqqandy jetpegeni, olar týraly málimettiń azdyǵy keıbir úmitkerlerdiń saıası reıtıngin tómendetti deýge bolady. Almaty qalasyndaǵy saılaýshylar sanynyń azdyǵy úgit-nasıhat jumysynyń tolyqqandy júrgizilmegenin kórsetedi.
Bıyl el aımaqtary men eldi mekenderindegi 10 myńnan asa saılaý ýchaskesinde, 62 basqa elderdegi saılaý pýnktterinde Qazaqstan Parlamenti pen máslıhattaryna depýtattardy saılaý joǵary deńgeıde ótti dep naqty aıta alamyz. Bul saılaýdyń taǵy bir ózindik ereksheligi dep eki túrli baǵyttaǵy saılaýdyń bir kúnge biriktirilip, bir ýaqytta ótkizilýin ataýǵa bolady. Nátıjesinde, qazirgi áleýmettik sıpaty kúrdeli zamanda osy áreket elimiz úshin úlken qarjylyq jáne ýaqyttyq tıimdiligi bar qadam dep baǵalanady. Jańa tarıhı kezeńde nurly aqylǵa, naqty nátıjelerge, áleýmettik jáne tulǵalyq jaýapkershilikke súıengen pragmatızm zamany týdy. Sol qısynmen alǵa qaraı úılesimdi jyljyǵan oryndy.
«Amanat» saıası keńistikte basymdyq tanytatyn partııa ekenin taǵy da dáleldedi, «Aýyl» partııasynyń ekinshi orynǵa shyǵyp, jańadan qurylǵan «Respýblıka» partııasynyń úshinshi orynǵa jaıǵasýy – bıylǵy saılaýdyń ózindik jańalyǵy. Biraq bul jaǵdaıdy kezdeısoq nátıjeler dep te ataýǵa bolmaıdy. Demek, elimizde barlyq deńgeıde demokratııalaný úderisteri óziniń erekshe kelbetin baıqata bastady. Tek endi barlyǵymyzǵa ádilettilik qaǵıdatyn partııalyq jáne dara tulǵalyq jaýapkershilikpen tikeleı astastyryp otyrý mańyzdy.
Serik NURMURATOV,
Fılosofııa, saıasattaný jáne dintaný ınstıtýty Fılosofııa ortalyǵynyń dırektory
