Oqıǵa • 01 Sáýir, 2023

UQShU elderi keshendi oqý-jattyǵý ótkizedi

Ujymdyq qaýipsizdik týraly shart uıymynyń Birikken shtabynda 2023 jyly Uıym áskerleriniń (Ujymdyq kúshterdiń) birlesken oqý-jattyǵýlaryn uıymdastyrý jáne ótkizý boıynsha alǵashqy kelissózder ótti, dep habarlaıdy Egemen.kz Birikken shtabtyń baspasóz qyzmetine silteme jasap.

Botakóz BAQBERGEN

28-30 naýryzda ótken kelissózderge Armenııa, Belarýs, Qazaqstan, Qyrǵyzstan, Tájikstannyń múddeli mınıstrlikteri men vedomstvolarynyń, sondaı-aq UQShU Birikken shtaby men Hatshylyǵynyń ókilderi qatysty.

Bıyl Uıym áskerleriniń (Ujymdyq kúshterdiń) keshendi oqý-jattyǵýlary birlesken jedel-strategııalyq «Jaýyngerlik baýyrlastyq» úlgisinde ótkiziledi. Bul – Uıym formatyndaǵy birlesken daıyndyqtyń joǵarǵy úlgisi bolyp sanalady.

UQShU jaýapkershiligi aımaǵynyń túrli óńirlerinde ujymdyq qaýipsizdik júıesiniń barlyq elementteri qamtylady.

«Jaýyngerlik baýyrlastyq-2023» keshendi jospary aıasyndaǵy birlesken oqý-jattyǵýlarda UQShU Daǵdarystyq áreket etý ortalyǵy men Uıymǵa múshe elderdegi ulttyq organdar basqarý pýnktileri tehnıkalyq quraldarynyń múmkindikteri paıdalanylady.

Belarýs aýmaǵynda Uıym áskerleriniń (Ujymdyq kúshterdiń) túrli komponentteriniń daıyndyǵyn biriktiretin birlesken jáne arnaýly oqý-jattyǵýlar josparlanǵan. Sonymen qatar Belarýste alǵash ret radıasııalyq, hımııalyq jáne bılogııalyq qorǵanysty birlese qalyptastyrý men medısınalyq qamtamasyz etýge baǵyttalǵan «Barer-2023» arnaýly oqý-jattyǵýy ótedi.

UQShU jedel áreket etý ujymdyq kúshteriniń arnaýly baǵyttaǵy kúshterdi qalyptastyrý quramyna engizilgen TJM qurylymdarymen «Skala-2023» oqý-jattyǵýyn ótkizý de josparlanyp otyr.

Jedel jáne jaýyngerlik daıyndyq is-sharalaryn ótkizý kezinde, UQShU ujymdyq qaýipsizdik júıesiniń kúshteri men quraldaryn damytýdyń ózekti máselelerin zertteý maqsatynda qorǵanys vedomstvolary, bazalyq oqý-ádistemelik jáne ǵylymı-zertteý uıymdarynyń ókilderin birikken oqý-jattyǵýlarǵa tartý tájirıbesi jalǵasady.