Keshe Astanada Táýelsiz Memleketter Dostastyǵyna qatysýshy memleketter Qorǵanys mınıstrleri keńesiniń (TMD QMK) kezekti otyrysy ótti. Onyń jumysyna Ázerbaıjan, Armenııa, Belarýs, Qazaqstan, Qyrǵyzstan, Reseı, Tájikstan, О́zbekstan qorǵanys vedomstvolarynyń delegasııalary qatysty.
Dostastyq sheńberindegi áskerı yntymaqtastyqtyń kópbeıindi sıpatyn eskere otyryp, Keńes músheleri ózara is-qımyldyń jalpy perspektıvalaryn jáne onyń basym baǵyttaryn aıqyndaýdyń tujyrymdamalyq kózqarastaryn talqylady.
Otyrysta kún tártibine sáıkes, Dostastyq memleketteri qorǵanys vedomstvolary kópjaqty áskerı yntymaqtastyǵynyń túrli aspektileri boıynsha 20-ǵa jýyq másele qaraldy. Qorǵanys mınıstrleri, atap aıtqanda, ınjenerlik áskerler áskerı qyzmetshileriniń gýmanıtarlyq mınasyzdandyrý mindetterin oryndaý kezeńindegi mártebesine, radıasııalyq, hımııalyq jáne bıologııalyq ahýaldy baqylaý jáne baǵalaý júıesin damytýǵa, áskerı maqsattaǵy spýtnıktik baılanys júıelerin paıdalanýǵa, Dostastyq elderi qarýly kúshterindegi ushýlar qaýipsizdigine qatysty qujattardy qarady.
Sonymen birge, áskerı yntymaqtastyqty tereńdetý aıasynda áýe shabýylyna qarsy qorǵanys, áskerı bilim, áskerı-qoldanbaly sport túrleri, sondaı-aq, kadrlyq jáne qarjylyq qamtamasyz etý salalaryndaǵy basymdyq berilgen zertteýlerdi júzege asyrý máseleleri qaraldy.
Otyrystyń qorytyndysy boıynsha áskerı-tehnıkalyq, áleýmettik-quqyqtyq jáne gýmanıtarlyq salalardaǵy ózara is-qımyldy ári qaraı nyǵaıtý jónindegi qujattar qabyldandy.
* * *
Qazaqstan Respýblıkasynyń Qorǵanys mınıstri Serik Ahmetov TMD-ǵa qatysýshy memleketter Qorǵanys mınıstrleri keńesiniń otyrysy sheńberinde Reseı qorǵanys vedomstvosynyń basshysy Sergeı Shoıgýmen kezdesti. Kezdesý barysynda Qazaqstan men Reseı arasyndaǵy áskerı jáne áskerı-tehnıkalyq salalarda ári qaraı ózara is-qımyl jasaý máseleleri boıynsha pikir almasyldy.
Taraptar TMD pishininde kópjaqty áskerı yntymaqtastyq júıesin jetildirýdiń, áskerı saladaǵy ıntegrasııalyq úderisterdi damytýdyń mańyzdylyǵyn atap ótti.
Kezdesý sońynda QR QM men RF QM arasyndaǵy 1994 jylǵy 19 qazandaǵy QR QK men RF QK áskerı aerodromdarynda qabyldaýdy uıymdastyrý, aerodromdyq-tehnıkalyq qamtamasyz etý jáne áskerı áýe kemesin kúzetý týraly kelisimge ózgertýler engizý týraly hattamaǵa qol qoıyldy.
Jaqsybaı SAMRAT, «Egemen Qazaqstan».
