Qadaǵalaýshy organ taratqan málimet boıynsha, qala prokýratýrasy jer zańnamasynyń qoldanylýyn taldaý barysynda kommersııalyq maqsatta jer berý kezinde jergilikti atqarýshy organdar tarapynan óreskel buzýshylyqtardy anyqtady.
Máselen, Qosshy aýyldyq okrýgi ákiminiń ókimimen 2016 jylǵy tamyzda Jaýapkershiligi shekteýli seriktestikke aýdany 3,2778 gektar jer ýchaskesine ýaqytsha óteýli jer paıdalaný quqyǵyn berdi. Osy ókimniń negizinde JShS men Selınograd aýdanynyń jer qatynastary bólimi arasynda jer ýchaskesine ýaqytsha óteýli jer paıdalaný týraly shart jasaldy.
Jaldaý merzimi birneshe ret uzartyldy. Alaıda 2016 jyldan bastap kásiporyn jer ýchaskesin nysanaly maqsaty boıynsha paıdalanýǵa baǵyttalǵan biryńǵaı is-qımyl jasaǵan joq. Al qujattarǵa sáıkes, JShS turǵyn úı keshenin salýdy kózdegen.
«Kadastrlyq quny 65 mln teńge bolatyn bul jer ýchaskesi Qosshy qalasynyń ortalyǵynda ornalasqan jáne joǵary ınvestısııalyq tartymdylyqqa ıe. Mundaı tujyrymdy 2021 jyly JShS basqa zańdy tulǵaǵa jaldaý quqyǵyn 120 mln teńgege satqanynan ǵana jasaýǵa bolady», dep habarlady Aqmola oblysynyń prokýratýrasy.
Alaıda qadaǵalaý organy jer ýchaskesi QR Jer kodeksiniń 48-babynyń normalaryn buza otyryp, atap aıtqanda, saýda-sattyq (konkýrstar, aýksıondar) ótkizilmeı berilgenin anyqtady.
«Aqmola oblysynyń mamandandyrylǵan aýdanaralyq ekonomıkalyq sotynyń 2022 jylǵy 7 qarashadaǵy sheshimimen Departamenttiń talap-aryz talaptary jerdi memleketke qaıtarýmen tolyq kólemde qanaǵattandyryldy. Bul sheshim 2023 jylǵy 16 aqpanda zańdy kúshine endi», delingen habarlamada.
Qosshy qalasy ákimdiginiń málimetteri boıynsha osy jer ýchaskesinde «jaıly mektep» ulttyq jobasyn iske asyrý sheńberinde mektep salý josparlanyp otyr.
