«Barselonanyń» jeńisti jylnamasyna da, qıyndyǵyna da «kináli» – onyń úzdik surmergeni Lıonel Messı. Oqyrmanǵa túsinikti bolý úshin áńgimeni áriden bastaıyq. Ekinshi myńjyldyqtyń basynda búkil álem nazary argentınalyq jasóspirimge aýdy. 17 jastaǵy bozbala ala dopty urshyqsha ıirip, qarsylasty kútpegen jerden qapy qaldyryp, jankúıerlerge endi-endi tanyla bastady. Keleshekte talantty fýtbolshyǵa aınalatynyn túsingen klýb basshylyǵy búkil básti soǵan tikti. Endi she, bala kezinde «Barselona» skaýttary ony Argentınanyń Rosarıo qalasynan attaı qalap aldyrdy. Aýrýshań baldyrǵannyń búkil em-domyn tóledi. Ata-anasyn alystaǵy Argentınadan janǵa jaıly Barselonaǵa aldyrtyp, jumys taýyp berdi. Qysqasy, mol qarajat shyǵyndady. Osyndaıda úmitińdi aqtaımyn dep qulshynyp turǵan jastyń qalaı betinen qaǵady?
Leo ózine artylǵan senimdi tolyǵymen aqtady desek qatelespeımiz. Onyń negizgi quramǵa aýysýymen «Barselonanyń» jeńisti jylnamasy bastaldy. Kóp uzamaı-aq Messı qarsylas qaqpashysynyń qorqynyshty túsine aınaldy. Dopty aıaǵynan alystatpaıtyn maıtalman aıyp alańynan da, onyń syrtynan da goldy qarsha boratty. Sóıtip, 2009 jyly Messı bastaǵan fýtbolshylar álemde buryn-sońdy kezdespegen rekord jasady. Bir jylda múmkin bolǵan alty kýbokty da qanjyǵasyna baılady.
Lıonel munymen toqtap qalmady. Komandasyn jeńiske jeteleýden jańylǵan joq. Goldy da saldy, áriptesine ádemi pasty da shyǵaryp berdi. Qysqasy, «Barselonanyń» jeńisine mol úles qosty. Tipti bir jylda 91 gol salyp, eshkimge buıyrmaǵan rekord ornatty. Katalonııalyq klýb sapynda ter tógip júrgende qol jetkizgen tabystary ushan-teńiz. On márte Ispanııa chempıony atandy. El kýbogin 7 ret basyna kóterdi. Segiz márte Ispanııa sýperkýboginiń ıegeri atandy. Chempıondar lıgasyn tórt márte jeńip, ÝEFA sýperkýbogine úsh ret ıe boldy.
Budan bólek, onyń jeke jetistikterinen taý turǵyzýǵa bolady. Jeti márte «Altyn dop» ıegeri atandy. Eýropanyń birneshe «Altyn býtsysyn» qanjyǵasyna baılap, Ispanııanyń eń úzdik surmergeni ataǵyn birneshe ret jeńip aldy. Sanaı berseńiz taýsylmaıdy.
Biraq, «Barselonanyń» jeńisti jylnamasyna mol úles qosqanymen, onyń ekonomıkalyq turǵyda álsireýine de bir adamdaı-aq atsalysty. Kez kelgen komanda úzdik fýtbolshysyn saqtap qalý úshin baryn salady ǵoı. Klýb basshylyǵy Leo basqa jaqqa alańdamas úshin bar jaǵdaıdy jasady. Birneshe ret kelisimshartty jańartyp, mol jalaqy usyndy. Tipti qaıbir jyly Messı álemdegi eń kóp jalaqy alatyn fýtbolshy atanǵany esimizde.
Budan qala berdi, komandalastaryn da onyń yńǵaıyna jyǵyp berdi. Máselen, 2009 jyly «Barselona» sapyna úzdik shabýylshynyń biri Zlatan Ibragımovıch qosylǵan. Eki qoshqardyń basy bir qazanǵa syımady. Shvesııalyq fýtbolshynyń talantty ekenine qaramastan, klýb basshylyǵy odan qutylýǵa asyqty. О́ıtkeni onyń alańda júrýi Messıge kedergi keltiretin.
Bul az deseńiz, komandaǵa jańadan qosylǵan fýtbolshylar bir-biriniń aýzyna túkirip qoıǵandaı Messıdi jer-kókke syıǵyzbaı maqtaıtyn. Tipti ony búkil klýbtan joǵary qoıatyndar tabyldy. Aqyr sońynda bapkerlerdiń ózi odan sekemdenip, aıaq tartyp sóıleıtin. Mundaı maqtaý men marapat qoısyn ba, Messı de minez tanyta bastady. Alańnan almastyrǵanda ashýlandy. Qarsylasqa aýyr sóz aıtty. Pas bermegen áriptesin aıyptady. Aıtqanyna kónbegen jas fýtbolshylarǵa qyryn qarady. Tipti buqaralyq aqparat quraldarynda Lıonel alańǵa kimdi shyǵaryp, kimdi qosalqy quramǵa qaldyrý kerek ekenin sheshedi degen qańqý áńgime tarady. Qysqasy, «Barselonada» jeke basqa tabyný qatty órshidi.
Mol jalaqy usynyp, búkil komandany yǵyna jyǵyp berý saldarynan katalonııalyq klýbtyń ekonomıkalyq jaǵdaıy da quldyrady, komandanyń oıyn-órnegi de qurtyldy. Aqyry Messı basqa klýbqa aýysqan soń, «blaýgrana» jeńistiń tátti dámin umytyp, talaı márte oısyraı utyldy desek artyq aıtqandyq emes. Qarjylyq daǵdarysqa da uryndy. Qazirgi tańda turalaǵan «Barselona» endi-endi aıaqqa turyp kele jatqandaı.
Árıne, klýbtyń qıynshylyǵyna tikeleı Messı kináli deýden aýlaqpyz. Biraq komandadaǵy jeke basqa tabyný sındromy «blaýgranany» batpaqqa batyrǵany anyq. Endeshe, bir adamdy asyra maqtap, búkil jetistik soǵan ǵana telip, «aq degeni alǵys, qara degeni qarǵysqa» aınaldyrýdyń durys emes ekenin basqalar da túsinse ıgi.
