Infografıkany jasaǵan Amangeldi Qııas, «EQ»
«Kompanııalarǵa elimizdegi ınvestısııalyq ahýal týraly nysanaly maqsattaǵy shaqyrý hattar men prezentasııalyq materıaldar joldandy. Qazaqstannyń shetelderdegi mekemeleriniń basshylary qyzyǵýshylyq tanytqan kompanııalardyń top-menedjmentimen jeke kezdesýler ótkizip jatyr. Sonymen qatar qazirgi ýaqytta sheteldik kompanııalardyń basym bóligi aımaqtaǵy ahýaldyń odan arǵy betalysyn kútip otyrǵandaryn atap ótken jón», dep málimdedi Investısııa komıtetiniń tóraǵasy Ardaq Zebeshev.
Bıyl elimizge 4 kompanııa kóship kelgen. Elektr qýaty jabdyqtaryn shyǵarýmen jáne sol saladaǵy ınnovasııalyq sheshimderdi ázirleýmen aınalysatyn fransııalyq kompanııanyń tehnologııalary elimizge transferlenip, Atyraý oblysynda trenıng ortalyǵy qurylmaq. Sondaı-aq germanııalyq kompanııa tarapynan Soltústik Qazaqstan oblysynda aýyl sharýashylyǵy salasynda qoldanylatyn tirkeme tehnıkasyn óndiretin zaýyt salý josparlanyp otyr. Reseılik kompanııa tarapynan Qostanaı oblysynda serippe jasaıtyn zaýyt ashylmaq. Taǵy bir reseılik kompanııa Astana qalasynda logıstıkalyq park salýǵa nıetti kórinedi.
Mınıstrliktiń habarlaýynsha, relokasııa jasap jatqan sheteldik kompanııalar elimizdiń zańnamalary men talaptaryn tolyq oryndap jatyr. Olar úshin qandaı da bir arnaıy jaǵdaı jasalmaıdy, olardyń keńseleri men óndiristeri bizdiń elge jalpy erejelerge sáıkes kóshirilip jatyr dep túsindirdi vedomstvo ókili.
Sonymen qatar mınıstrlik ókili sheteldik ınvestısııa tartý boıynsha elimizdiń Ortalyq Azııada kóshbasshy ekenin jáne ınvestorlardyń bizdiń eldi tańdaýy tartymdy ınvestısııalyq klımattyń tıimdiligi arqasynda múmkin bolyp otyrǵanyn jetkizdi.
«Geosaıası jaǵdaılarǵa baılanysty Eýrazııa keńistiginen ketýge májbúr bolyp otyrǵan sheteldik kompanııalarǵa Qazaqstanǵa qonys aýdarý tıimdi bola otyryp, elimizdiń halyqaralyq arenadaǵy syrtqy bedeliniń ósýine aıtarlyqtaı septigin tıgizip jatyr», deıdi ol.
2022 jyldyń qorytyndysy boıynsha elimizge tartylǵan tikeleı sheteldik ınvestısııanyń jalpy kólemi 28 mlrd dollar bolǵan. Bul 2021 jylǵy kórsetkishten 17,7 paıyzǵa artyq. 2022 jyly sheteldik ınvestorlardyń qatysýymen 46 ınvestısııalyq joba iske qosyldy. Jalpy, 1,74 trln teńge ınvestısııa tartylyp, 6,2 myń jumys orny ashylǵan.
