Elimizde ınklıýzıvti bilim berý júıesin damytý boıynsha aýqymdy jumys atqaryldy. Atap aıtqanda, sońǵy jyldary normatıvtik-quqyqtyq aktilerge birtalaı ózgerister engizildi. Máselen, erekshe bilim berýdi qajet etetin balalardyń sanaty keńeıtildi.
«Buryn osy sanatqa tek bilim alý barysynda densaýlyǵyna baılanysty qıyndyq kóretin múmkindigi shekteýli balalar ǵana jatatyn. Al búgingi tańda bul sanatqa basqa da – áleýmettik nemese ekonomıkalyq turǵydan bolsyn belgili bir qıyndyq kóretin balalar jatqyzyldy», dedi Á.Kýderınova.
Spıkerdiń aıtýynsha, sońǵy eki jylda oqýshylarǵa kómek kórsetý boıynsha jazǵy mektep uıymdastyrylyp keledi. Daryndy balalar da erekshe nazarǵa alyndy.
Ortalyq dırektorynyń aıtýynsha, erekshe bilim berýdi qajet etetin balalardyń ishinde eń kóp qıyndyq týǵyzatyny – múmkindigi shekteýli balalar. Qazir mundaı balalardyń sany 188 myńnan asady.
«Mundaı balalardy anyqtap, oqytý úshin psıhologııalyq-medısınalyq-pedagogıkalyq konsýltasııalar jumys isteıdi. Sonymen birge osy balalardy qoldaý maqsatynda psıhologııalyq-pedagogıkalyq súıemeldeýdi júrgizetin arnaıy mekemeler ashylǵan. Dálirek aıtqanda, Qazaqstanda 208 túzetý kabıneti, 13 ońaltý ortalyǵy, sonymen qatar 42 arnaıy balabaqsha men 99 arnaıy mektep jumys isteıdi», dedi Arnaıy bilim berýdi damytý ortalyǵynyń basshysy.
Búginde 4 myńnan asa jalpy bilim beretin mekteptiń ishinde 40 myńnan astam erekshe bilim berýdi qajet etetin bala oqıtynyn aıta ketý kerek.
