Kegen aýdandyq bilim bóliminiń bas mamany Darhan Bekbatyrovtyń málimdeýinshe, aýdanda 32 mektep jumys isteıdi. Onyń 21-i – orta, 4-eýi – negizgi, 7-eýi bastaýysh mektepter. Munda jalpy sany 5140 oqýshy bilim alady. Kegen aýylyndaǵy Sádýaqas Serkebaev atyndaǵy mektep-gımnazııa jáne Jalańash aýylyndaǵy Sársenbaı Beısenbetuly atyndaǵy orta mektepter aralas mektepke jatady. Basqa aýdandardaǵy sııaqty bala sanynyń tyǵyzdyǵy men mektep tapshylyǵy joq. Aýdandaǵy mektep oqýshylary arasynda qazaqy tárbıeniń qaımaǵy buzylmaǵan aýylda jantúrshigerlik oqıǵanyń qalaı bolǵanyn turǵyndar da túsine almaı álek. Ásirese tentegi bolsa tezge salyp, el ishine iritki túspeýin tileıtin aýyl aqsaqaldarynyń janyn kúızeltip, arqalaryn aıazdaı qarıdy.
«Aýylymyzda 250 tútin bar. Negizinen baıyrǵy turǵyndar. Arasynda atajurtqa kelgen qandastarymyz da bar. Buryn-sońdy mundaı jaman atqa ilikpegen edik. Aýyldastarymyzdyń aýyzbirshiligi men yrys-yntymaǵy jarasqan, bir atanyń balasyndaı baýyrmal, kópshil, eńbekqor eldiń urpaǵy ósip-ónip otyr. Aıaqasty bolǵan oqıǵa bárimizdi eseńgiretip otyr. Bolǵan iske bolattaı berik bolyp, budan ári mundaı sumdyq jaǵdaıǵa jol bermeýge turǵyndardyń árbirin shaqyramyz. Balanyń tárbıesin bosańsytýǵa bolmaıdy. Onyń boıyndaǵy minez-qulyqtyń qalyptasýy men júrip-turýyn ata-ana ár kez nazarda ustap, qadaǵalap otyrǵany abzal bolar edi. Kim balasyn jamanshylyqqa qııady? Bir bilmestik oryn aldy», dep keıidi Saty aýyldyq aqsaqaldar keńesiniń tóraǵasy Esbol Rysbaev.
Saty aýylyndaǵy sumdyq oqıǵaǵa baılanysty A.Túrkebaev atyndaǵy mektep-lı
seıdiń dırektory Bazar Mombekovpen telefon arqyly tildeskenimizde: «Mektebimizde buzaqylyq boıynsha esepke tirkelgen bala bolmaǵan edi. О́kinishke qaraı, orny tolmas qaıǵyly jaǵdaı boldy. Bul balalardyń tártibi men oqý úlgerimi jaqsy bolatyn. Buǵan deıin teris áreketterin kórmedim. Olardyń sol kúni sýdyń jaǵasyna barǵany ras. Biraq álimjettiktiń bolǵan-bolmaǵany sot-medısınalyq saraptamadan soń belgili bolady», dep jaýap berdi.
Al oqıǵa oryn alǵan kúni jasóspirimniń ólimine kináli degen aıyppen 11-synyp oqýshysy kúdikti retinde ustalǵan. Jalpy, oblystyq polısııa departamentiniń málimetinshe, jyl bastalǵaly óńirde 9 oqýshy óz ómirin qıǵan. Olardyń ekeýi Talǵar aýdanynda bolsa, Jambyl, Kegen, Ile aýdandarynda bir-birden, Qarasaı aýdanynda qańtardan beri 4 oqıǵa tirkelgen. Onyń ekeýi Áıteı aýylyndaǵy Qosynov orta mektebiniń oqýshylary bolsa, eki oqıǵa Shamalǵan men Turar aýyldarynda tirkelgen.
«Jyl basynan beri Almaty oblysynda 9 sýısıd, 3 ózine-ózi qol salýǵa umtylý faktisi tirkeldi. Sonyń ishinde bir ǵana Qarasaı aýdanynda 4 óz-ózine qol jumsaý oqıǵasy bolyp otyr. Osyndaı qaıǵyly jaǵdaıdyń aldyn alý men balalarǵa psıhologııalyq kómek kórsetý, densaýlyǵyn jaqsartý maqsatynda bilim basqarmasy bekitken keshendi is-sharalar jospary ázirlenip, oblys ákimi janyndaǵy balalar quqyǵyn qorǵaý jónindegi ýákilmen birlese otyryp, bul baǵyttaǵy jumystar atqarylyp jatyr. Aýdandardaǵy barlyq mekteptegi balalardyń qatysýymen jasyryn saýaldamalar toltyrylady. Nátıjesinde, qyzyl aımaq, sary aımaq, jasyl aımaqtar boıynsha qansha bala qaı aımaqqa jatatynyn anyqtap, qyzyl men sary aımaqqa jatatyn balalarmen tikeleı jumys júrgiziledi. Jylyna eki ret oblystyq prokýratýra, ıývenaldyq polısııa qyzmetkerleri men qoǵamdyq uıymdar, ata-analar keńesi, kolledjder men bilim bólimi basshylarynyń qatysýymen jıyn ótkizip, kúızeliske ushyraǵan balalarǵa psıhologııalyq kómek kórsetý taqyrybynda alqaly keńes ótkizip kelemiz. 2018 jyly osyndaı jan shoshyrlyq jaǵdaılar kóbeıip ketken edi. Soǵan oraı Talǵar aýdanynan bastalǵan qanatqaqty joba nátıjesinde óz-ózine qol jumsaý áreketi tómendegen bolatyn. Jumys júrmeı jatqan joq emes. Pedagog-psıhologter oqytylyp, tájirıbelerin damytýda arnaıy semınarlar men dóńgelek ústelder ótkizilip jatyr», deıdi Almaty oblysy bilim basqarmasy basshysynyń orynbasary Gúlsara Tastandyqyzy.
Almaty oblysy
