2012 jyly qalada kenshilerdiń qurmetine arnaıy «Kenshi dańqy» monýmenti boı kóterdi. Sol monýmenttiń keskin-kelbeti jóninde qalalyq ákimdikte birneshe márte talqylaýlar ótkeni de belgili. Kóptiń talqysy tekke ketpedi, monýment halyqtyń kóńilinen shyqty. 2012 jylǵy tamyzdyń sońǵy jeksenbisinde monýmenttiń resmı ashylýy ótti. Monýmenttiń atshaptyrym aınalasy da abattandyrylyp, kópshiliktiń bos ýaqytyn tıimdi paıdalanýyna laıyqty etip jasaldy.
Arada bes jyl ótkende, ıaǵnı 2017 jyly sol kezdegi qala ákimi A.Ydyrysovtyń bastamasymen jáne «Qazaqmys» basshylyǵynyń qoldaýy arqasynda bul jerge taý-ken tehnıkalaryn ákelip, ornatý arqyly ashyq aspan astyndaǵy mýzeı jasaýdyń negizi qalandy. Sóıtip, «Kenshi dańqy» monýmentiniń mán-mazmuny arta tústi. Monýment mańy qala turǵyndarynyń ǵana qýanyshy emes, úlkendi-kishili kelip jatatyn qonaqtarǵa da uıalmastan kórsetetin orynǵa aınaldy.
О́kinishke qaraı, keıin birtindep kútimsizdikke ushyraı bastady. Buǵan árıne, kóshe buzaqylarynyń da qosqan «úlesi» joq emes. Sondaı-aq óz ýaqtysynda jiberilgen sapasyzdyq ta syr berdi. Muny baıqaǵan qala basshylyǵy 2019 jyldan bastap «Qazaqmys» basshylyǵyna «Kenshi dańqyna» qaıtadan kúrdeli jóndeý júrgizý, osy jerde kenshilerdiń Qurmet taqtasyn ornatý týraly usynys jasady. Usynys qoldaý tapqanymen, naqty júzege asyrýǵa kelgende esh qozǵalys bola qoımaıdy. Sondyqtan qala basshysy 2020 jylǵy 9 shildede «Kazakhmys Copper» AQ basqarma tóraǵasy B.Qyryqpyshevtyń atyna hat joldap, kelisilgen sharýany Kenshiler kúnine deıin bitirý jóninde oı tastaıdy. Biraq korporasııa tarapynan esh qozǵalys bolmaıdy. 2021 jylǵy 17 naýryzda qala ákimi taǵy da hat joldap, ýáde etilgenine úshinshi jylǵa aıaq basqan sharýanyń oń sheshimin tabýdy suraıdy. Bul joly da máseleniń sheshimin tappaǵanyna kórki qashqan «Kenshi dańqy» monýmentiniń qazirgi keıpi dálel.
Bıyl Sátbaev shahary qala mártebesin ıelengenine 50 jyl tolǵanyn toılaıdy. Qazir ártúrli deńgeıde daıyndyq jumystary júrgizilip jatyr. Qala ákimi Sh.Áýbákir sol mereıtoı aıasynda «Kenshi dańqy» monýmentiniń mańyn «Qazaqmys» basshylyǵy qaıtadan jóndep, abattandyryp berýge ýáde etkenin aıtady. Joǵarydaǵy qujattarǵa qaraǵanda ýáde buǵan deıin de az berilmegenge uqsaıdy ǵoı... Álde olar qalanyń jartyǵasyrlyq mereıtoıyn kútip júrdi me eken?
«Qazaqmys» áleýmettik sıpattaǵy kompanııa ekenin jıi jarııalap jatady. Sondaı-aq Jezqazǵan, Sátbaev qalalarynda «Qazaqmystyń» qatysýymen qandaı nysandar paıdalanýǵa berilgenin de árqashan maqtanysh etedi. Sonyń biri – kenshilerdiń kúndelikti eńbeksúıgishtigi men batyldyǵynyń sımvoly retinde boı kótergen «Kenshi dańqy» monýmenti. Al onyń qazirgi kúıin korporasııa kóterińki leppen aıta almaıdy-aý...
Ulytaý oblysy,
Sátbaev qalasy
