«Turmystyq zorlyq-zombylyq – jalpy búgingi kúnniń ótkir áleýmettik problemasy, óıtkeni ol qurbandardyń ózderine ǵana teris áser etip qoımaıdy, sonymen birge qoǵamdy turaqsyzdandyrady, áleýmettik tártipke qaýip tóndiredi. Jyl saıyn polısııaǵa otbasylyq janjaldarǵa qatysty 100 myńnan astam shaqyrý kelip túsedi», deıdi R. Zulqaıyrov.
Alaıda kelip túsken 100 myńnan astam habarlama boıynsha kináliler eshqandaı jazaǵa tartylmaǵan. Zań bar bolsa da, júıe durys jumys istemeıdi. Onyń birden bir sebebi jábirlenýshilerdiń «úıdegi urysty syrtqa shyǵarǵysy kelmegeninen» bolyp otyr.
«Sonymen qatar olardyń 60%-y boıynsha polısııa jábirlenýshilerdiń ótinish berýden bas tartýyna baılanysty shara qoldana almady (2023 jylǵy 3 aı –27 357 habarlamadan 10 548 narıadqa esepten shyǵaryldy). Onsyz, qoldanystaǵy zańnamaǵa sáıkes, polısııa qyzmetkeri zorlyq kórsetkenderdi jaýapqa tarta almaıdy. Saldarynan jazasyzdyq – júgensizdikke jol beredi», deıdi IIM ÁPK tóraǵasynyń orynbasary.
Qol jumsaý janjal shyǵarýǵa beıim adamdardyń ádetine aınalǵan. Al onyń sońy, odan da aýyr zardaptarǵa ákep soǵyp jatyr.
IIM málimetinshe, Quqyq buzýshylardyń 80 paıyzy er adam.
Sonyń ishinde, 30 jastan 50 jasqa deıingi er adamdar 52 paıyz. Turaqty jumys orny barlar 74 paıyz bolsa, kásiptik jáne joǵary bilimi joqtar 90 paıyz.
Tıisinshe, zardap shegetinderdiń 78 paıyzy áıelder.
Renat Zulqaıyrovtyń sózinshe, kóbine olar jábirleýshige materıaldyq jáne psıhologııalyq táýeldi. Jyldar boıy qorlaý men qorqytýǵa shydaıdy. Balalar da zardap shegedi. Olar qatygez kórinisterge kýá bolady. Densaýlyq saqtaý uıymynyń baǵalaýy boıynsha, otbasyndaǵy zorlyq-zombylyq jasóspirimderdiń psıhıkasyna, rýhanı jáne emosıonaldyq damýyna keri áser etedi. Balalar otbasynda kóretin minez-qulyq pen agressııanyń bul úlgisin olar qatarlastaryna jáne úıden tys jerde kórsetedi.
