«Partııalardy ortaq iske jumyldyrýdyń taǵy bir mańyzdy joly – Parlamentte depýtattyq birlestik qurý. Assambleıadan saılanǵan bes senator bul sharýanyń basy-qasynda júrýi kerek. Etnosaralyq qatynas salasyndaǵy ózin-ózi basqarý ınstıtýttaryn damytý – mańyzdy mindettiń biri. Assambleıa bul jumysty etnomádenı birlestikterdiń qyzmetin úılestirý arqyly atqarýda», dedi Qasym-Jomart Kemeluly.
Sondaı-aq Prezıdent memlekettiń ákimshilik basshylaryna Assambleıa jumystaryna óz úlesterin qosýdy tapsyrdy. Aradaǵy tyǵyz baılanystyń mańyzdy ekenin aıtyp, turaqty kezdesýler uıymdastyrýǵa tapsyrma berdi.
«Osynda mınıstrlikterdiń, mekemelerdiń, aımaqtardyń, Parlamenttiń jáne Prezıdent Ákimshiliginiń basshylary otyr. Olardyń kópshiligi – Assambleıa múshesi. Assambleıa qyzmetine belsene atsalysý – barshańyzǵa ortaq mindet. Assambleıa da ákimdikter men máslıhattardyń jumysyna atsalysýy qajet. Bir sózben aıtqanda, Assambleıa jáne bılik organdary ózara tyǵyz baılanysta bolýǵa tıis. Munyń aıryqsha máni bar.
Quzyretterdi joǵarydan tómenge berý isinde osy máseleni eskergen jón. Memlekettik organ basshylary Assambleıa ókilderimen turaqty kezdesip otyrýy qajet. Mundaı kezdesýler kem degende jarty jylda bir ret ótkizilýi kerek», dedi Memleket basshysy.
