«Áskerı bilim jáne ǵylym júıesin damytý – asa mańyzdy mindet. Áskerı akademııalar, ınstıtýttar álemdik standarttarǵa saı bolýǵa tıis. Osy saladaǵy joǵary oqý oryndarynyń materıaldyq bazasyn nyǵaıtý kerek. Sondaı-aq oqý baǵdarlamasyn zaman talabyna saı beıimdeý qajet», dedi Qasym-Jomart Toqaev.
Memleket basshysynyń aıtýynsha, búginde jigerli áskerı mamandardy daıarlaý úshin basqa da joǵary oqý oryndarynyń múmkindigin keńinen paıdalaný qajet. Bul rette rektorlar stýdentterdiń jaýyngerlik daıyndyǵyna tikeleı jaýapty bolýǵa tıis ekeni aıtyldy.
Prezıdenttiń paıymdaýynsha, áskerı qaýipsizdik máselesi ǵylymı tujyrymǵa da súıenýi kerek. Iаǵnı, ǵylymı-zertteý jumysyna basymdyq berý qajet.
«Áskerı oqý oryndary qorǵanys salasyndaǵy kásiporyndarmen tyǵyz baılanys ornatýy kerek. Qazirgi qaqtyǵystardyń sıpaty múlde bólek. Álemde gıbrıdti soǵys júrip jatyr. Sondyqtan Qarýly Kúshterdiń zııatkerlik qabiletin arttyrý – óte mańyzdy mindet. Bilim men tárbıe árdaıym birin-biri tolyqtyryp otyrýy qajet. Sarbazdarymyz qaısar, batyl, sondaı-aq bilimdi bolýy shart. Jaýyngerlerdiń boıyna otanshyldyq, adamgershilik, izgilik qasıetterdi sińirýimiz kerek. Olar naǵyz azamat degen atqa laıyq bolýy qajet. Bir sózben aıtsaq, armııa – bul rýhanı tárbıe ortalyǵy», dep atap ótti Qazaqstan Qarýly Kúshteriniń Joǵarǵy Bas qolbasshysy.
Qasym-Jomart Kemelulynyń aıtýynsha, Qazaqstan azamattary qatigezdik, álimjettik sııaqty qoǵamǵa qaýipti úrdisterge jol bermeýi qajet.
«Búgin osy jerde ardaqty ardagerlerimiz otyr. Olardyń tájirıbesi, kórgen-túıgeni mol. Biz ardagerlerge zor qurmet kórsetemiz. Aǵa býynnyń tájirıbesin jas sarbazdardy tárbıeleý isine tıimdi paıdalanǵan jón», dep túıindedi Memleket basshysy.
