5 mamyrda Býdapeshtte Qazaqstannyń Majarstandaǵy elshiligi Uly Otan soǵysyndaǵy jeńistiń 78 jyldyǵyna oraı Bostandyq alańynda jáne qalanyń ortalyq zıratynda keńestik azat etýshi jaýyngerlerdiń eskertkishterine gúl shoqtaryn qoıdy.
Jýkevıl qalasynda 8 mamyrda Jeńis kúni qarsańynda Qazaqstannyń Fransııadaǵy dıplomattary osy eldi fashıstik basqynshylardan azat etý jolynda qaza tapqan qazaqstandyqtardy eske alyp, taǵzym etti. Gúl shoqtaryn qoıý rásimi 1995 jyly Tarn departamentiniń Jýkevıl kommýnasynda Qazaqstan elshiligi ornatqan eskertkishtiń janynda ótti. Bul memorıal fransýz memleketi qorǵaıtyn nysandar tizimine engizilgen.
Sol kúni Norvegııanyń Lıllehammer qalasynyń mańyndaǵy Iorstadmoen áskerı zıratynda Keńes jaýyngeriniń eskertkishine gúl qoıý rásimi de ótti. Is-shara 8 mamyrda atap ótiletin Norvegııany azat etý kúnine arnalǵan. Rásimge qazaqstandyq dıplomattar, Lıllehammer qalasynyń meri Ingýn Trosholmen, sondaı-aq Iorstadmoen áskerı bazasynyń qolbasshylyǵy men jergilikti qorǵanys gvardııasy qatysty. Memorıalda Qazaqstan men Norvegııanyń týlary kóterildi.
Sankt-Peterbýrgte Keńes halqynyń Uly Otan soǵysyndaǵy jeńisiniń 78 jyldyǵy qarsańynda dástúr boıynsha QR Bas konsýldyǵynyń qyzmetkerleri Keńes Odaǵynyń Batyry Álııa Moldaǵulovanyń, qazaqtyń uly aqyny Jambyl Jabaevtyń eskertkishterine, sondaı-aq «Otan-Ana» monýmentine jáne Lenıngradty qorǵaýshylar – Qazaqstan týmalaryna arnalǵan memorıaldyq taqtaıyna gúl shoqtaryn qoıyp, qurmet kórsetti.
