Móldir bulaq

«Nur Otan» partııasy, qala ákimdigi, «ARS» prodıýserlik kompanııasy men «Eýrazııa» birinshi arnasynyń uıymdastyrýymen ótken «Aıalaǵan Astana» balalar televızııalyq mýzykalyq baıqaýy óz máresine jetti. Alaman báıgede ozyp shyqqan Muhammedálı Júginisov endigi kezekte Qazaqstannyń atyn «Detskaıa novaıa volna» baıqaýy arqyly álemge tanytady degen senim bar.  Jaqynda «Eýrazııa» arnasynyń tikeleı efırinen «Aıalaǵan Astana» televızııalyq mýzykalyq balalar baıqaýynyń aqtyq syny kórsetilgen bolatyn. Fınalda Qazaqstannyń ár aımaǵynan jınalǵan 17 daryn ıesi erekshe qoıylymdarymen kópshilik aldynda óner kórsetti. Balalar aldyna áýeli baıqaýda ozyp shyǵýdy, sóıtip, 1 mıllıon teńgeni qanjyǵaǵa baılaýdy maqsat etip qoıǵan edi. Bul meje oryndaldy. Endigi shyń «Detskaıa novaıa volna» saıysynyń bıigin baǵyndyrý, Qazaqstandy tanystyrý bolyp tabylady. Televızııalyq shoýda jas óner­pazdar Rýslan Botabaev bastaǵan «Zaratushtra Band» orkestrimen jandy daýysta án shyrqady. Keıbir qatysýshylar dýette, endi biri trıoda óner kórsetti. Jalpy konserttik baǵdarlamaǵa 12 qoıylym ázirlendi. «Balalyq shaqtyń ánurany» atty baıqaýdyń alǵashqy kúni qa­ty­sýshylar balalar ánderi reper­týarynan mýzykalyq shyǵar­ma­lar oryndasa, ekinshi kúni áıgi­li mýlt­fılmderdegi álemdik hıt­ter­di, al «Atameken» atty qory­tyn­dyda balǵyn ánshiler Astanaǵa, barsha qazaqstandyqtarǵa arnap án saldy. Halyqaralyq qazylardyń sheshimi men tikeleı efırden SMS arqyly daýys berýdiń nátı­jesi boıynsha elordalyq Muhammedálı Júginisov «Aıalaǵan Astananyń» jeńimpazy atandy. Ol baıqaýdyń úsh kúngi nátıjesinde de qatarlastarynan oq boıy ozyq kórinip, qazylar alqasynyń eń joǵary baǵasyna ıe boldy. Aıta ketý kerek, erekshe daýys ıesi bıyl Qazaqstandy «Detskaıa novaıa volna» baıqaýynda tanystyrmaq. Baqytty sátin irke almaı janaryna jas tunǵan óren: «Meniń armanym «Detskaıa novaıa volna» baıqaýyna qatysyp qoıý ǵana emes, álemdik estradanyń jaryq juldyzy atanǵan Maıkl Djekson sekildi jáne ózimniń týǵan aǵam Rústem Júginisov sııaqty ataqty ánshi bolý», – deıdi. О́ner saıysynyń birinshi júl­desi – Oral qalasynan kelgen Danııa Ishanqulovanyń, ekinshi oryn – «Balapandar» trıosyndaǵy Lýıza Nurqýatova (Aqtaý), Aldııar Oreken (Ekibastuz), Janaıkerim О́tegenovanyń (Qostanaı), al úshinshi júlde almatylyq Iаsmın Májıtovanyń enshisine tıdi. Buǵan qosa, D.Ishanqulova kórermender kózaıymyna aınaldy. Astana qalasy ákimdiginiń arnaıy syılyǵy Pavlodar qalasynyń namysyn qorǵap kelgen Nastıa Pershıkovaǵa buıyrdy. Al, Syr eliniń sańlaǵy Dıas Omar «Nur Otan» partııasynyń syılyǵyna ıe boldy. Eske sala keteıik, alǵash ret bul joba byltyr júzege asqan bolatyn. Irikteý kezeńinde Qazaqstannyń 16 qalasynan 8 ben 12 jas araly­ǵyndaǵy 1000-ǵa jýyq daryndy bala baq synady. Ándi súıetin, sahnada óner kórsetýdi armandaıtyn balalar úshin bul naǵyz merekelik tartý boldy desek, qatelespeımiz. Torǵyn ÁBÝShAHMAN.