Densaýlyqqa dem bergen

Qaraǵandydaǵy professor Hafız Muqajanov atyndaǵy travmatologııa jáne ortopedııa oblystyq ortalyǵynyń súıek-býyn júıesiniń jaraqaty men aýrýlaryn emdeýdegi úlgili is-qyzmeti erteden el aýzynda. Aldymen, atalǵan esimniń ardaq tutylýyn aıta ketsek, bul kisi osy orynnyń negizin qalaǵan, salanyń sanaýly sheber hırýrgi retinde tanylǵan, súıektiń týa bitken qısyǵyna jáne synyqqa operasııa jasaýdy jetildirý jónindegi ǵylymı eńbekteri qundylyǵyn joǵaltpaǵan belgili tulǵa. Aldynan sabaq alyp, tájirıbesin túıip, elimizdiń medısınalyq mekemelerinde isin jalǵastyrýshy shákirtteri júzdep sanalady. Oblystyq delingenmen mundaǵy shyn mánindegi altyn qoldy otashylar men dárigerlerdiń dármendi shıpasy jaıly rızalyq lebizder aıshylyq jerlerge de jetip jatýy-aq ataq-bedelin ańǵartar jaı. Osyndaılyq medısınalyq mekeme qabyldaý bólimshesiniń meńgerýshisi, birinshi sanatty travmatolog-ortoped Djamalıddınov Vıdadı Sohraboǵly baıan etkendeı sońǵy jyldarda dıagnos­tıka men emdeý úshin zamanaýı qural-qondyrǵylardyń molynan qoldanýy, ınnovasııalyq tehnologııalar endirilýi arqasynda súıek synyqtaryn qalpyna keltirý jáne ońaltý jańa sapalyq deńgeıge kóterilgen. Soǵan baılanysty sátti isterdiń laıyqty baǵalanýy az emes. Byltyr Oksfordtaǵy Eýropalyq bıznes assambleıasynyń kásibı deńgeıi joǵary       «Eń úzdik kásiporyn» Sokrat syılyǵymen marapattalýy sonyń bir dáleli deýge bolady. Al jaqynda medısınalyq qyzmet kórsetý mekemeleriniń sapalyq kórsetkishi boıynsha «European Awards for Best Practices» syılyǵy taǵy mártebe asyrdy. Munda tirek-qımyl jaraqatyn alǵan, tize-býyn syrqatyna shaldyǵýshylardyń jylyna 6 myń pasıentine táýliktik stasıo­nar boıynsha joǵary mamandandyrylǵan medısınalyq kómek kórsetiledi. Dene zaqy­myna qaraı shuǵyl jasalatyn opera­sııa­lardyń ózi 4 myńnan asyp jatady. Búginde ártúrli jaǵdaılarǵa baıla­nysty jaraqattanýshylar, aıaq-qol qyzmeti nasharlaýshylar az emes bolǵandyqtan olardyń tez qabyldanyp-qaralýyn qamtamasyz etý basty maqsat bolyp tabylady. Aýrýlardy qabyldaý eki kezek boıynsha uıymdastyrylýy on­syz da qınalyp kelýshilerdiń ýaqyt uzatpaı qarala alýyna múmkindik jasap, kóńilderine dem beredi. Biz atalǵan bólmeni aralap tanysqanymyzda, ǵajaby sol, ádette osyndaıǵy basqa oryndardaǵydaı uzaq sonar kezek kútip, renjip-kúıinip otyrýshylardy kóre almadyq. Klınıkanyń bólimsheleri 210 kereýetke eseptelgen. Eresekter men balalar jaraqaty men ortopedııasy, kúıik jáne iriń jaraqaty, shuǵyl jaraqat, ońaltý men qalypqa keltirý, kúndizgi stasıonar bólimsheleri jumys isteıdi. Eger kórsetilgen medısınalyq qyzmet sapasyna qanaǵattanbaǵan jaǵdaıda máseleni sheshý úshin kómektesetin bólimshe de bar. Naýqastarǵa medısınanyń sońǵy ozyq tehnologııalary paıdalanyla otyryp, em qoldanylady. Sonyń birin aıtqanda, máselen, ósirilgen allofıbroblasterdi kúıik shalǵan kezde jedel emdeýge qoldaný elimizde alǵash ret endirildi. Ony transplantasııalaý teri betiniń 10 paıyzdan astam bóligine teri almastyrǵanda júzege asyrylady. Byltyrǵy jyl aıaǵynan bas­tap endirilgen bul ádis 5 pasıentke sátti jasalǵan. Barlyq jaǵdaıda oń áseri baıqaldy. – Ereksheligi sol, adam óziniń aýtotransplanttary edáýir ulasyp ósip, jaranyń irińdeýi oryn almaıdy. Sonymen birge, qaıtadan ota jasaý talap etilmeıdi jáne aýrý aldyńǵy jalpyǵa birdeı ádispen em alǵandarǵa qaraǵanda az merzim ishinde emdelip shyǵady, – deıdi Vıdadı Sohraboǵly. Sondaı-aq, ol atap ótkendeı, qoıylǵan dıagnozdy naqtylaý úshin kompıýterlik tomografııany, osteoden­sıtometrııany, súıektiń mıneraldy tyǵyzdyǵyn anyqtaıtyn ýltra dybys­ty zertteýdi, jańa úlgidegi eń sezimtal rentgenologııalyq apparattardy qoldanýda qatelesý yqtımaldyǵyn aldyn alýǵa múmkindik beredi. Sonyń nátıjesinde syrqat syry dál anyqtalyp, ota jasaý nemese otasyz emdeý sátti júrgiziledi. Mine, aımaqtaǵy, qala berdi elimizdegi bel­di travmatologııa jáne ortopedııa orta­ly­­­­ǵy san-salaly qyzmetiniń bir parasy, ony jaqsarta túsýdegi izdenis izderi osyndaı. Aıqyn NESIPBAI, «Egemen Qazaqstan». QARAǴANDY.