«Qazaqstan agrarlyq sektorǵa ınvestısııa salý úshin keń múmkindikter usynady. Agroónerkásip kesheninde ınvestısııalyq jobalardy iske asyrý úshin memlekettik qoldaý is-sharalary, onyń ishinde salalyq jeńildikter men salyqtyq preferensııalar kózdelgen. Investorlar iri jobalardy júzege asyrý úshin Úkimetpen tikeleı ınvestısııalyq kelisim jasaı alady. Bul salyqtyń negizgi túrleri boıynsha erekshe sharttar alýǵa múmkindik beredi», dep atap ótti mınıstr.
Onyń aıtýynsha, Qazaqstan tarapy aýyl sharýashylyǵy ónimderin qaıta óńdeý salasyndaǵy jobalardy damytýǵa múddeli. Qazir elimizde qaıta óńdeý kásiporyndary úshin sýbsıdııalaýdyń túrli baǵyttary bar. Memleket jumys istep turǵan zaýyttardy jańǵyrtýǵa jáne jańa zaýyttar salýǵa jumsalatyn shyǵystardyń bir bóligin óteıdi, aınalym qarajatyna beriletin nesıeler boıynsha syıaqy mólsherlemelerin sýbsıdııalaıdy, sondaı-aq shıkizatty qaıta óńdeýge tapsyrǵan kezde fermerlerdiń shyǵyndarynyń bir bóligin ótep beredi.
«Tuqym sharýashylyǵy, ósimdik sharýashylyǵy jáne azyq-túlik óndirisi salasyndaǵy qytaılyq kásipkerlerdi Qazaqstanǵa shaqyramyz. Biz yntymaqtastyq pen birlesken jobalardy iske asyrý úshin ashyqpyz. Aýyl sharýashylyǵy mınıstrligi óz tarapynan ınvestorlar úshin barlyq qajetti jaǵdaılardy usynýǵa jáne jan-jaqty qoldaý kórsetýge daıyn», dedi mınıstr.
Al sala basshysy QHR ShUAA QKP partkomynyń hatshysy Ma Sınjýımen kezdesýinde Qazaqstan men Shyńjań-Uıǵyr avtonomııalyq aýdany arasyndaǵy aýyl sharýashylyǵy óniminiń taýar aınalymyn jylyna 1 mlrd dollarǵa jetkizýge ýaǵdalasqan edi.
Aıta keteıik, Qazaqstannyń Qytaımen saýda-sattyǵynyń 40%-dan astamy Shyńjańǵa tıesili, 2022 jyldyń qorytyndysy boıynsha kórsetkish 382 mln dollardy qurady. Erbol Qarashókeev elimizdiń aýyl sharýashylyǵy salasyndaǵy ekijaqty yntymaqtastyqty keńeıtýge jáne aýyl sharýashylyǵy ónimderin ózara jetkizýdi ulǵaıtýǵa kóp mán beretinin atap ótti. Qazir Qytaıda organıkalyq jáne ekologııalyq taza aýylsharýashylyq ónimderin tutynýǵa suranys artyp keledi.
Atap aıtqanda, Qazaqstan muzdatylǵan et jetkizýdi qaıta bastaýǵa, salqyndatylǵan et jáne balyq ónimderin, qus eti men qosalqy ónimderdi, shoshqa eti, jumyrtqa, jylqy eti jáne basqa da taýar túrlerin eksporttaýdy bastaýǵa daıyn.
Alaıda eksporttyq áleýetke Qytaı tarapynan ýaqytsha engizilgen veterınarlyq shekteýler kedergi keltirip tur. Bul rette Qazaqstanda juqpaly aýrýlar boıynsha salaýattylyqty qoldaý úshin barlyq qajetti resýrstar bar, olar Dúnıejúzilik janýarlar densaýlyǵy uıymynyń saraptamalyq mıssııasymen belgilengen.
«Janýarlardyń aýrýlaryn ekijaqty shekteý tájirıbesi uzaq jyldarǵa jalǵasatyn saýda kedergilerine ákelip soǵady. Meniń oıymsha, tıimsiz saýda tásilderin qaıta qaraıtyn jáne búkil aýmaqtan eksportty shektemeı, bizdiń elderimizdi aımaqtandyrýdy tanýǵa kóshetin ýaqyty keldi. Sondaı-aq veterınarlyq jáne fıtosanıtarlyq talaptardy kelisý merzimderin qysqartý qajet», dedi mınıstr.
Sonymen qatar Qytaı naryǵy bizdiń astyq eksporty úshin úlken qyzyǵýshylyq týdyryp otyr. Búgingi tańda jyl saıynǵy jetkizilim kólemin 1 mln tonnaǵa deıin jáne odan da kóp ulǵaıtýǵa múmkindik bar. ShUAA-ǵa jetkiziletin ónimderdiń tizimine burshaq daqyldary, sondaı-aq maıly daqyldardyń kúnjarasy qosylýy múmkin, bul óz kezeginde elderimizdiń arasyndaǵy taýar aınalymy kóleminiń edáýir ulǵaıýyna yqpal etpek.
