Almaty OKA-synyń neırohırýrgııa bólimshesiniń meńgerýshisi ótkizgen otanyń nátıjesinde bitelgen tamyrdan aınalyp ótip, mı arterııasyndaǵy qan aǵysyn qalpyna keltirýge múmkindik týdy. Dáriger samaıústi men mıdyń orta tamyrynyń arasyna anastomoz qoıady. Mundaı ota maı túıinshektiń paıda bolýy saldarynan bas mı arterııasynyń tesigi sımptomdyq bitelýi baıqalatyn naýqastarǵa jasalady.
Asqan sheberlikpen jasalatyn ota tek qana mıkroskop astynda júredi, óıtkeni tamyrdyń dıametri 0,1 -0,15 sm-den aspaıdy, osy maıda tamyrdy 10-12 jerden tigý kerek.
Atyraýda buryn-sońdy jasalyp kórmegen mundaı ota túrleri «Sovmınde» kóp jyldan beri jasalyp júr. Endigi jerde Marat Sarshaevtyń sheberlik dárisiniń arqasynda óńirde osyndaı ota jasaý jolǵa qoıylmaq.
Sonymen birge Atyraýda alǵash ret tize men jambas býynyn aýystyrý otasy da jasaldy. Bul otany atqarǵan OKA travmatologııa jáne ortopedııa bólimshesiniń meńgerýshisi Sáken Moldaǵalıev aıtýynsha, qazirge Atyraýda osy otany jasaıtyn mamandar men qajetti jabdyq joq.
«Býyn aýystyrý otasy bizde 15 jyldan beri jasalynyp jatyr. Atyraýda da mundaı otany jasatýdy kútip júrgen kisilerdiń qatary bar. Tehnologııa damyǵan qazirgi zamanda synǵan súıek pen tizeni emdeý burynǵydaı qıyn emes. Izraıldegi mamandar tipti, súıek pen bulshyqetti qoldan ósirýdi úırengen, ıaǵnı súıek pen bulshyqetti tolyqtaı jasandylarymen almastyratyn kún de jaqyndap keledi. Biz de osy úderisten qalys qalmaı, úırenip, tájirıbege endirip otyrmyz», deıdi mamandar.
Ár aımaqta ótkizile bastaǵan Prezıdent isteri basqarmasynyń Medısına ortalyǵy kúnderi ozyq medısına jetistikterin barshaǵa qoljetimdi etý maqsatynda uıymdastyrylyp júr.
Al Atyraýǵa tek «Sovmınniń» atynan travmatologııa jáne ortopedııa bólimshesiniń meńgerýshisi Sáken Moldaǵalıev, neırohırýrgııa bólimshesiniń meńgerýshisi Marat Sarshaev, gınekologııa bólimshesiniń meńgerýshisi Sholpan Álıeva, onkohırýrgııa bólimshesiniń meńgerýshisi Ǵalııa Horoshash, aqyly medısınalyq qyzmetter bólimshesiniń meńgerýshisi Dılıaram Razıeva, neırohırýrg Dáýlet Súıembetov, nevrolog Aqerke Táýirbekova, gastroenterolog Lázzat Qazanbaeva attanǵan edi.
Osylaısha almatylyq mamandar Atyraýda tize býyny artroskopııasy men endoprotezdeý, jatyr men jatyr aınalasyna laporoskopııalyq aralasý, ekstraıntrakranıaldy mıkrotamyrlyq anastomoz, laparoskopııalyq adrenalektomııa otalaryn jasap, pasıentterge keńes berip, áriptesterine de dárister júrgizdi.
Almaty
