Májilis depýtatynyń aıtýynsha, keıbir eldi mekenderde gazdyń baǵasy shekti baǵadan asyp ketken. Ashynyp otyrǵan halyq ereýilge shyǵamyz dep eskertý jasaǵan.
«Májilis depýtattaryna máselesin jetkizip, habarlasqan 500-ge jýyq turǵynmen kezdesý úshin 2023 jyldyń 26 mamyrynda Almaty oblysyna baryp, aryz-shaǵymdaryn tyńdadym. Máseleniń ýshyǵyp ketkeni sonshalyqty, bul daý sheshilmese, eki aptadan keıin myńdaǵan adam joldy jaýyp, jappaı ereýilge shyǵatyndaryn eskertip otyr», dedi Maqsat Tolyqbaı.
Májilis depýtatynyń sózinshe, Shalqar, Qaırat, Eńbekshi, Qumaral, Úshterek sııaqty ondaǵan eldi mekendi, sondaı-aq Aıajan, Aıanat, Araı jáne Darhan saıajaılaryn gazben qamtyp otyrǵan kompanııa basshylary baǵany qoldan kóterip otyr.
«Bul kompanııanyń artynda sonshama kim tur? Ne jergilikti prokýratýra ne jergilikti ákimdik ne antımonopolııa buıryqty oryndatýǵa shamasy kelmeıdi. Tipti myńdaǵan halyq shýlap jatyr. Solardyń aldyna shyǵyp, jaýap beretin bir de bir jaýapty adamdy tappaı keldik. Aqyry ózimiz baryp, mine, máseleni Májilis alańynda kóterýge týra kelip otyr», dedi depýtat.
