Maqsat Tolyqbaı Almatydaǵy Hilton qonaq úıiniń 160 qyzmetkeriniń aryz-shaǵymyn tyńdap qaıtqan. Bul qonaq úıdiń ıesi Sholpan Karaneeva ǵımaratty Qaırat Satybaldynyń reıderlik jolmen tartyp alǵanyn 2020 jyly-aq ashyq aıtyp, talaı buqaralyq aqparat quraldaryna suhbat bergen eken.
«Osydan tórt jyl buryn (2019 j) franchaızıng kelisimimen Hilton qonaq úıin salǵan. Qurylysty aıaqtaý úshin «Capital Bank Kazakhstan» AQ-ǵa qonaq úıdi kepilge qoıyp 4 mlrd 200 mln teńge somasynda qaryz alǵan. Koronavırýs pandemııasy bastalǵan 2020 jyly Hilton qonaq úıi qyzmetin ýaqytsha toqtatqan.
Sol kezde Prezıdent kásipkerlerdi turalap qalmaý úshin bankterge tólemderdi ýaqytsha toqtatýǵa buıryq bergen. Al «Capital Bank Kazakhstan» AQ Prezıdent buıryǵyn pysqyrmaǵan. Bank tarapy ótinishke jaýap bermeı, qonaq úıdi «Zańger» kollektorlyq agenttigine beredi. Al «Zańger» qonaq úıdiń naryqtaǵy quny 9,5 mlrd teńgeden assa da, ony bar bolǵany 5,1 mlrd teńgege baǵalap, «Baıdala» JShS-ǵa satyp jibergen», deıdi Sh.Karaneeva.
Sonymen qatar «Baıdala» kompanııasynyń artynda Qaırat Satybaldy turǵanyn, reıderlik basyp alý áreketi dep apellıasııalyq sotqa shaǵymdanǵanymen eshqandaı nátıje shyqpaǵanyn jasyrmady.
«Qaırat Satybaldy abaqtyǵa qamalyp, dúnıe-múlki tárkilengen kezde bizdiń quzyrly organdar DoubleTree by Hilton qonaq úıin de Qaırattyń tárkilengen múlikteriniń qataryna qosyp qoıǵan eken. «ABLI Qurylys» kompanııasy «Biz «Baıdala» JShS-men sottasyp jatyrmyz, bul qalaı Qaırat Satybaldyǵa ótip ketedi, is áli qaralyp jatyr ǵoı?!» dep aryz túsirgennen keıin Qaırat pen «Baıdala» arasynda tez arada kelisimshart (dogovor kýplı-prodajı) jasalady. Túrmede! Ol jerge notarıýsty qalaı kirgizip júr, túrmede otyrǵan Qaırattyń qaltasynda 6 mlrd teńge qaıdan júr?! Bul jerde de zańsyzdyq kóp», delingen jazbada.
Shaǵymdanýshynyń aıtýynsha, Qaırat Satybaldy ustalsa da, reıderlik áreket áli de jalǵasyp jatyr.
«Endigi shema bylaı: qonaq úıdi Qaırat Satybaldynyń atynan memlekettik aktıvke ótkizip jiberip, arzan baǵada aýksıon arqyly óz attaryna aýdaryp alǵysy keletin basqa múddeli toptar qatty jumys isteýde. Qaırat Satybaldy ustalsa da, reıderlik áreket jalǵasyp jatyr», deıdi shaǵymdanýshy.
«Osy oraıda biz shyn máninde Ádiletti Qazaqstan qurǵymyz kelse, osyndaı zańdy bıznesin áldekimder kópe-kórneý tartyp alǵan tulǵalardyń da zary men muńyna qulaq túrip, kóńil bólýimiz kerek shyǵar. Jábirlenýshi taraptyń suraıtyny bir-aq nárse: quzyrly organdar isti ádil qarasa eken», dep jazbasyn aıaqtady depýtat.
Sonymen qatar ol shaǵymdanýshylardyń aryzyn Antıkor men Bas prokýrorǵa joldaǵanyn aıtty.
