– Eldos, sizdiń ońaltý ortylyǵyn basqaratynyńyzdy bilemiz. Qandaı adamdarmen jumys isteısizder? Nátıjesin kórip, aıaqqa turǵandar bar ma?
– Eń alǵashqy kásibimdi 2014 jyly 3 mıllıon teńgemen kishigirim fıtnes klýb ashýdan bastadym. Adam sany kóbeıgennen keıin sporttyq ońaltý ortalyǵyna aınaldyrdym. Múmkindigi shekteýli jandarmen, omyrtqasynan zaqym alǵan, DSP, ınsýlt alǵan adamdarmen jumys isteımiz. Ońaltý ortalyǵy jaqsy nátıje kórsetti. Kelýshilerdiń sany da artyp keledi.
– Alakólden múgedekterge arnalǵan shıpajaı ashtyńyz. Bıznesińizdiń erekshe jandarmen baılanysty bolý sebebi nede?
Ákem – Alakóldiń týmasy. Alakólge demalýǵa baramyn. Jalǵyz ózim ózgelerden erekshelenip júretinime yńǵaısyzdanatynmyn. Sonda «nege men sııaqty erekshe jandar munda kelmeıdi? О́zim sııaqty adamdar janymda bolǵan kezde basqalar bulaı tesilip qaramas edi ǵoı» degen oı jıi mazalaıtyn. Sonymen qatar kóptegen demalys oryndarynda múmkindigi shekteýli jandarǵa jaǵdaı jasalmaǵan. Osyny eskerip maǵan birden múmkindigi shekteýli jandarǵa arnalǵan demalys ornyn ashý ıdeıasy keldi. Bul kásipti 2016-2017 jyldary qolǵa alǵan edim. Shamamen 15-16 mıllıon teńge qarajat jumsadym. Qazir osy kásiptiń arqasynda 37 adamdy jumyspen qamtyp otyrmyn.
– Kásipker bolý da ońaı emes. Bastan túrli qıyn jaǵdaılar kezdesip turady. Mundaı qıyndaqtardy qalaı eńseresiz?
– Eń bastysy adamda minez bolý kerek. Qasqaıyp qarsy turyp qıyndyqtan qoryqpaı, ony jan-jaqty zertep batyl sheshim qabyldaý qajet. Kásipker únemi izdeniste bolyp, bilim alyp, básekege qabiletti bolýǵa umtylǵany durys. Sebebi alǵan bilimi ár túrli keleńsiz jaǵdaılardyń aldyn alady. Jas kásipkerlerge aıtarym, jańa qadamdardan qoryqpaı, ıdeıalardy tartynbaı júzege asyryńyzdar. Sonymen qatar kásip bastaǵysy keletin adam myqty kásipkerlerdiń ortasynda júrgeni abzal.
– Japonııanyń Qazaqstandaǵy elshiligi uıymdastyrǵan «Shóp tamyry» atty baıqaýǵa qatysyp, 26 mln teńgeniń grantyn utyp alǵanyńyzdy estidik. Joba ne týraly?
– Iá, 160 memlekettiń ókilderi qatysqan baıqaýda Japonııanyń grantyn utyp aldym. О́te qıyn boldy. О́tinim berýdiń ózine tórt aı ýaqyt ketti. Qujattardyń barlyǵyn ótkizgennen keıin bir jarym jyldan soń grantty jeńip aldyq. Qomaqty qarjyǵa Amerıka, Germanııa, Polsha, Italııa, Reseı sekildi shet elderden arnaıy qurylǵylar satyp aldyq. Qazir olardyń paıdasyn kórip otyrmyz.
– Sizdiń oıyńyzsha, tabysty bolýdyń qupııasy nede?
– Adamǵa paıdańdy tıgizip, ómirin jaqsy jaqqa ózgertýge sebep bolsań, sodan artyq baqyt joq. Adam saǵan shyn júregimen alǵysyn aıtyp turǵanda, tabys kózi ózinen-ózi arta beredi. «Qazaqtyń qarǵys alma, alǵys al» deıtini sodan. Basqalarǵa kómektesý tabysty adamnyń tynysyn ashady.
– Myqty kásipker ǵana emes, myqty sportshy ekensiz. Qaı sport túrimen aınalysasyz?
– Keýdemdi kerip «men mynany istedim» dep aıta almaımyn. Menen de myqty kásipkerler bar. Synyptastarymnyń arty da bolǵan joqpyn, aldy da emespin. Kóshten qalmaı ilesip kele jatqanyma shúkir etemin. Sportty janym súıedi. Júzýden sport sheberimin. Bul úshin arnaıy shákirtaqy da alamyn. О́zimdi áleýmettik kásipker sanaımyn. Sondyqtan adamdarǵa qolymnan kelgenshe kómektesip júrgenim – meniń úlken jetistigim.
– Kólikti de ózińiz júrgizedi ekensiz. Qıyndyq týdyrmaı ma?
– Basynda qorqynysh boldy. Kólik apatynan keıin temir tulpardy tizgindeýge júreksinesiń. Qalanyń shetine shyǵyp aıdap kórdim. Sodan keıin kólikti ózim úıge aıdap kelgende ata-anam qatty tańǵalǵan-dy. Qazir Almatyǵa ózim baryp kelip júrmin. Adam arbada otyrsa da, eshkimge táýeldi bolmaı kólik aıdaǵanyn durys sanaımyn.
– Bıyl Jetisý oblystyq máslıhat depýtattyǵyna úmitker boldyńyz. Nege mundaı qadamǵa bardyńyz? Saıasatqa aralasýǵa jospar bar ma?
– Baǵymdy synap kórgim keldi. Áıtpese, mundaı qadamǵa ataq, abyroı úshin qyzyǵyp barǵan joqpyn. О́zim sııaqty erekshe jandarǵa jaqsy jaǵdaı jasaıtyn sheshimderdiń qabyldanýyna yqpal etkim keldi. Olar da qoǵamnyń tolyqqandy múshesi ekenin sezinse eken deımin. Jastar ıdeıalaryn aıtyp, aqyl surap keledi. Solarǵa barynsha kómektesip, baǵyt-baǵdar kórsetkim keldi. Eń basty maqsatym – jastarǵa qoldaý kórsetý.
– Jeke ómirińiz týraly aıta ketseńiz. Jubaıyńyzben qalaı tanystyńyz?
– Jubaıymmen bir keshte bılep júrip tanystym. Arbada otyrsam da esh qysylmaı baryp sóılestim. Ýaqyt ótkennen keıin bir-birimizdi jaqynyraq tanı bastadyq. Aramyzda sezim paıda boldy, ómirge degen kózqarasymyz birdeı ekenin túsindik. Sodan keıin qol ustasyp, shańyraq kóterýge sheshim qabyldadyq. Áıelim – Allanyń amanaty. Erkek degen atqa laıyq bolyp, onyń barlyq jaǵdaıyn jasaýǵa, túsinýge, qoldaýǵa tyrysamyn. Joldasym tabıǵatynan óte salmaqty, bilimdi, kez-kelgen jumysqa óte jaýapty qaraıtyn jan-jaqty adam. Maǵan baǵyt-baǵdar kórsetip, aqylyn aıtyp, únemi qoldap, bar mahabbatyn aıamaıdy. Alǵa qoıǵan maqsattarymyzǵa birtindep qol jetkizip kelemiz. Osyndaı ómirlik jar kezdeskenine sheksiz rızamyn. О́mirde eki dúnıeden shataspaý kerek deıdi ǵoı. Birinshi jar tańdaý bolsa, ekinshisi mamandyq tańdaý. Meniń ekeýinen de jolym bolǵan sııaqty.
– Bala tárbıesinde nege mán beresiz?
– Eń aldymen balalaryma sapaly bilim bergim keledi. О́ıtkeni bilim – olardyń bolashaǵynyń irgetasy. Qazir eki balamdy júzýge, oı-sanasyn damytatyn ortalyqtarǵa aparamyn. Ýaqyttaryn paıdaly dúnıege jumsaǵanyn qadaǵalaımyz. Ysyrap pen obaldy úıretemiz. Bar mahabbatymyz ben meıirimimizdi tógip ósirip jatqan jaıymyz bar. Qolymyz qalt etse balalarmen syrlasyp, oınap, ýaqytty kóńildi ótkizýge tyrysamyz.
– Alda qandaı joba-josparlaryńyz bar?
– Basty maqsat – ońaltý ortalyǵyn damytý. Elimizdiń eń myqty ońaltý ortalyǵynyń biri bolsaq deımiz. Osyǵan qatysty kóp jobamyz bar. Sol ıdeıalarymdy júzege asyrǵym keledi.
– Jigeri qum bolyp, ómirden túńilgen, sátsizdikterge tap bolǵan jandarǵa qandaı keńes beresiz?
– Taǵdyrlastaryma aıtarym, qandaı jaǵdaı bolsyn sen óz ata-anańa, aǵa-baýyr, ini-qaryndasyńnyń aldynda jaýapkershiligiń bar ekenin umytpa. О́mirińdegi eń jaqyn adamdardyń haqysyn berýge mindettisiń. Qazir zaman damyǵan. Qandaı ispen aınalyssań da, únemi damý ústinde, izdeniste bolýyń kerek. Suranysta bolý úshin myqty maman bolýyń shart. Mysaly, men arbada otyrsam da magıstratýrany bitirdim. О́mirde kezdesken ár múmkindikti kádeńe jaratý kereksiń.
– Áńgimeńizge rahmet!
Áńgimelesken Gúlshahra SANSYZBAI,
«Egemen Qazaqstan»
