Joba maqsaty — Shemonaıha men Qaton-Qaraǵaı aýdandarynda jańa talshyqty optıkalyq baılanys jelisi ınfraqurylymyn quryp, turǵyndardy naryqtaǵy baǵadan arzan qunmen eń az degende jyldamdyǵy sekýndyna 15 Mbıt bolatyn ınternetpen qamtamasyz etý.
Jobaǵa Aitas Foundation kompanııasy bastamashy bolyp otyr. Joba jetekshisi En San Lıdiń aıtýynsha, qor buǵan deıingi jobalardy júzege asyrý barysynda ınternetke qoljetimdilik aýyl halqynyń ómir sapasyn, mekteptegi bilim sapasyna tikeleı áser etetinine kóz jetkizdi.
«О́tken jyly Aitas Foundation bilim berý jobalaryn júzege asyrý barysynda aýyldardaǵy nashar ınternet máselesine nemese tipti bolmaýyna baılanysty qıyndyqtarǵa tap boldy. Alǵashynda jobaǵa 5 mektep qatysqandyqtan máseleniń ózektiligi baıqalmady, alaıda mektep sany ósken saıyn ınternet tapshylyǵy jumysty tejeı tústi. Osy kezde qyzmetkerlerimiz ben mınıstrlik ókilderi máseleni sheshý joldaryn qarastyra bastady. Qorymyz jumys isteıtin aımaqtarda ásirese ózekti bola tústi. Sondyqtan Qaton-qaraǵaı jáne Shemonaıha aýdandarynda «Aýyldyq aımaqtardaǵy ınternet» pılottyq jobasyn iske qostyq. Jobany sátti júzege asyrý úshin qor osy máseleni qolǵa alatyn kompanııalardy izdeı bastady. Sol kezde FastLaın kompanııasy óz qyzmetterin usynyp, jobaǵa kommersııalyq negizde kirdi. Búginde Shemonaıha aýdanyndaǵy 3 eldi mekendi qamtıtyn jobany bastap otyrmyz», dedi joba jetekshisi En San Lı.
Bul joba aıasynda Qaton-Qaraǵaı men Shemonaıha aýdandaryna qarasty aýyldardyń úıleri men mekemeleri jyldam ınternetke qosylady. Ol úshin áýelden qolda bar Transtelekom jelilerimen GPON tehnologııasy arqyly jańa talshyqty optıkalyq baılanys jelisi magıstraldary salynady.
«Bıznes, qoǵam men úkimettiń birlesken jumysynyń arqasynda aýyl halqynyń ómir sapasy arta túsedi. Joba jumysyna sáttilik tileımiz», dedi Shemonaıha qalasy ákiminiń orynbasary Medet Elshibaı.
Shemonaıha aýdanynyń turǵyny Danıl Bobrov jańa jobaǵa qyzyqqanyn, ınternetke qosylý úshin ótinish qaldyrýǵa nıetti ekenin jetkizdi.
«Bizdiń qala shaǵyn, biraq úlken qalalardyń turǵyndary sııaqty adamdarǵa ınternet jyldamdyǵy men sapasy mańyzdy. Meni tarıftik josparlar men usynystar qyzyqtyrdy, jaqyn arada abonentter qataryna qosylamyn dep oılaımyn», deıdi ol.
Sonymen qatar joba aıasynda Qaton-Qaraǵaı men Shemonaıha aýdandaryndaǵy áleýmettik mańyzy bar nysandarǵa da ınternet jelisi júrgiziledi. Qajet bolǵan jaǵdaıda túrli nysandarda ınternet jelisin salý nemese jańartý da josparda bar.
