Shymkent qalasy PD esirtki qylmysyna qarsy is-qımyl basqarmasynyń qyzmetkerleri Qarataý aýdany kósheleriniń birinde esirtki tasymalymen aınalysqan áıel adamdy ustady.
Jedel ýákilder áıelden belgisiz zat salynǵan 40 polıetılen paketin tárkiledi. Saraptama nátıjeleri tárkilengen zattardyń sıntetıkalyq esirtki ekenin kórsetti.
Tergeý barysynda 1969 jyly týǵan Túrkistan oblysynyń turǵyny Telegram arnasy arqyly jumys izdegenin aıtty. Nátıjesinde ol ınternette ońaı ári jyldam aqsha tabýdy usynǵan belgisiz bireýmen tanysqanyn moıyndady. Tórt aı boıy aýyl turǵyny Túrkistan qalasyna esirtki tasymaldaýmen aınalysqan. Ol Telegram arqyly berilgen nusqaýdy oryndap, jumys aqysyn elektrondy túrde alyp otyrǵan.
«QR QK-niń 297-baby 3-bóligi (О́tkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý) boıynsha sotqa deıingi tergep-tekserý júrgizildi. Qylmystyq ister jónindegi mamandandyrylǵan sot 54 jastaǵy áıeldi 10 jylǵa bas bostandyǵynan aıyryp, jazasyn qaýipsizdigi ortasha rejımdegi kolonııada óteý týraly úkim shyǵardy», delingen habarlamada.
