Polsha – Ortalyq jáne Shyǵys Eýropa elderi arasynda Qazaqstannyń jetekshi syrtqy ekonomıkalyq áriptesteriniń biri. 2022 jyly ózara saýda kólemi – 1,36 mlrd dollar, onyń ishinde qazaqstandyq eksport – 771 mln, Polshadan ımport 587,5 mln dollardy quraǵan. Polshadan el ekonomıkasyna tikeleı ınvestısııalardyń jalpy aǵyny – 75 mln dollar. Búginde Qazaqstanda 100-den astam polıak kompanııasy jumys isteıdi.
Forýmnyń maqsaty – Qazaqstan men Polsha arasyndaǵy saýda-ekonomıkalyq, ınvestısııalyq yntymaqtastyqty jandandyrý, eki eldiń isker seriktesteri arasynda qoldanystaǵy jáne jańa tikeleı baılanystardy nyǵaıtý. Shara aıasynda bizdiń delegasııa polıak kompanııalarymen birqatar ekijaqty kezdesýler ótkizdi. Polshanyń ónerkásiptik damý agenttigimen kezdesý barysynda metal-
lýrgııa, taý-ken jáne mashına jasaý ónerkásibi, toqyma óndirisindegi yntymaqtastyq máseleleri talqylandy.
Polshanyń ónerkásiptik damý agenttigi – 100 paıyz memlekettik basqarýshy holdıng jáne ónerkásipti damytý ınstıtýty. Kompanııa eldiń negizgi ónerkásiptik kásiporyndarynyń aksııalaryn basqarady (90-nan astam iri polıak ónerkásiptik kompanııalary).
Forým barysynda ásirese, mashına jasaý salasy keńirek talqylandy. «Saýda jáne ónerkásip sektoryndaǵy yntymaqtastyq áleýeti» paneldik sessııasy aıasynda Qazaqstan mashına jasaýshylar odaǵynyń basqarma tóraǵasy Meıram Pishembaev otandyq mashına jasaý salasynyń damýy týraly aıtyp berdi.
«2022 jyldyń qorytyndysy boıynsha saladaǵy óndiris kólemi 9 paıyzǵa ulǵaıdy. Negizgi kapıtalǵa salynǵan ınvestısııalar 10 paıyzǵa ósip, 258 mln dollardy qurady. Mashına jasaý óniminiń eksporty 2 ese artyp, aqshalaı mánde 3,8 mlrd dollar boldy», dedi M.Pishembaev.
Budan bólek, otandyq IT-kompanııalar men uıymdar úshin sybersecurity, fintech, biotech, medtech, agrotech, software, deep tech, robotic, gaming, AI salalarynda polıak seriktesterimen B2B kezdesýler uıymdastyryldy, sondaı-aq ınvestorlar aldynda IT jáne High tech jobalaryn tanystyrý jáne vorkshoptar men aqparattyq sessııalarǵa qatysý múmkindigi berildi.
