Tekserý komıssııasynyń quramyna elimizdiń Densaýlyq saqtaý, Tótenshe jaǵdaılar, Ekologııa jáne tabıǵı resýrstar, sondaı-aq Eńbek jáne áleýmettik qorǵaý mınıstrlikteriniń qyzmetkerleri men QMG-niń enshiles jáne táýeldi mekemeleriniń 50-den astam qyzmetkeri engen. Olar eki aı boıy «О́zenmunaıgazǵa» qarasty 17 óndiristik qurylymdyq bólimshesine 8 enshiles munaı-servıstik mekemeleriniń – jalpy 55 sharýashylyq nysandardyń jumysyn tekseristen ótkizdi jáne jumysshylardyń suranysyna oraı qurylǵan jumys toby 43 merdiger mekemege tekserý júrgizýde.
«Eńbek ujymdarynyń búgingi ahýalymen, áleýmettik-turmystyq jaǵdaıymen tanysý maqsatynda saýalnama júrgizildi, kásipodaq ókilderimen kezdesý ótkizildi jáne jeke azamattardan da ótinishter tústi. Komıssııa quzyryna jalpy 3 myń-nan astam suraq kelip tústi, naqtyraq aıtsaq ujymdardan 2 261, kásipodaq uıymdarynan 647, jazbasha ótinishter retinde 102 suraq boldy. Sondaı-aq «О́zenmunaıgazdyń» ózekti máseleleri men qarjy-sharýashylyq qyzmetin taldaý nátıjeleri boıynsha 160 derek tirkeldi, onyń ishinde 188 buzýshylyq pen sáıkessizdik anyqtaldy. Nátıjesinde, 7 másele Qazaqstan Respýblıkasynyń zańnamasyna sáıkes sharalar qabyldaý úshin quqyq qorǵaý organdaryna berildi, 10 másele boıynsha qyzmettik tergeý júrýde, al 101 másele boıynsha jaýapty adamdarǵa tártiptik jaza qoldaný jóninde tapsyrma berildi», dedi Jumys tobynyń jetekshisi D.Hasanov.
Brıfıngte «О́zenmunaıgazǵa» jumysqa ornalasý jáne ishki kommýnıkasııa máseleleri, merdigerlik uıymdardy basqarý men mekemeniń qarjy-sharýashylyq qyzmetin tekserý qorytyndylary jarııalandy. QMG Ekonomıkalyq jáne ishki qaýipsizdik bóliminiń bastyǵy Á.Atabaev óz baıandamasynda elimizdiń zańnamasyna sáıkes sharalar qabyldaý úshin quqyq qorǵaý oryndaryna berilgen 7 derektiń árqaısysyna jeke toqtalyp ótti.
«О́zenmunaıgaz» aýtstaffınginiń jekelegen qyzmetkerlerin jalǵan jumysqa ornalastyrý boıynsha aqparatqa tekserý júrgizildi. Kompanııaǵa keltirilgen zalaldyń aldyn ala somasy 47 mln teńgeni quraıdy. Osy fakti boıynsha QR QK 361-baby 3-tarmaǵynyń 4-bóligi, ıaǵnı laýazymdyq ókilettikterin teris paıdalaný boıynsha kompanııanyń laýazymdy basshy tulǵalaryna qatysty sotqa deıingi tergeý júrgizilýde», dedi Á.Atabaev. Sırek qoldanystaǵy mamandyq ıesi retinde jumysqa qabyldanǵan 238 adamnyń 17-siniń biliktiligi joq bolyp shyqsa, 33 adam qysqa merzimde kompanııadaǵy ózge qyzmetterge aýysyp ketken. Baıandamashynyń aıtýynsha, sırek qoldanystaǵy mamandyq ıesine degen suranysty shtatqa qabyldanýdyń amaly retinde paıdalanǵan. Sondaı-aq Mańǵystaý oblysy oqý oryndarynyń jalǵan sertıfıkattary «О́zenmunaıgaz» kompanııasynyń shtatyna kirý úshin paıdalanylǵany týraly faktiler, «О́zenmunaıgaz» AQ Korporatıvti oqý ortalyǵynyń hattamasynda komıssııa músheleriniń atynan áldekimder jalǵan qol qoıyp, jumysqa qabyldaý prosedýrasynan ótpegen adamdardy ınjener qyzmetine qabyldaǵany týraly fakti anyqtalyp, quzyrly oryndarǵa jiberilgen.
Komıssııa múshesi B.Tólegen baıandamasynda kompanııadaǵy oryn alǵan kemshilikterdi aıtyp, tergeýge joldanǵan 7 derekti jan-jaqty taldaı tústi.
«Búgingi tańda Jańaózen qalasynda jumyssyzdyq máselesi – kún tártibinen túspeıtin ózekti máseleniń biri. Qaladaǵy jumyssyz turǵyndar tarapynan munaı-gaz salasynan jumys taýyp ber degen talaptar kóbeıgen soń, «О́zenmunaıgaz» Jańaózen qalasy ákimdigi jáne jumyspen qamtý ortalyǵymen birlesip, atalǵan kompanııaǵa jumysqa ornalastyrý algorıtmi ázirlenip, bekitilgen bolatyn. Bul algorıtm boıynsha qalanyń jumyssyz turǵyndary, «О́zenmunaıgaz» zeınetkerleriniń balalary aldymen qaladaǵy memleketti kommýnaldyq mekemelerge, odan keıin aýtstaffıngke kezeń-kezeńimen jumysqa qabyldanady. Sodan keıin ǵana atalǵan kompanııa shtatynda oryn bosaǵan kezde ǵana jumysqa ornalasady. Biraq sońǵy kezderi osy algorıtmge baılanysty jumyssyz turǵyndar tarapynan aryz-shaǵymdar kóbeıip ketken bolatyn. Arnaıy topqa 200-den astam aryz-shaǵym kelip tústi, osy negizde algorıtm boıynsha jumysqa qabyldaý úrdisine júrgizilgen tekseris qorytyndysynda birqatar kemshilik anyqtaldy», dedi B.Tólegen. Ol 2019 jylǵy jumyspen qamtý algorıtminiń jáne 2021 jylǵy sırek qoldanystaǵy mamandyqtar boıynsha personalmen qatý baǵdarlamasynyń óreskel buzylýy ashyqtyq pen ádilettilikti saqtaýdyń bastapqy ıdeıasyn burmalap, «О́zenmunaıgazdyń» jumys berýshi retindegi bedelin túsirgendigin, qaladaǵy jumyssyzdar arasynda áleýmettik narazylyq týdyrýǵa sebep bolǵandyǵyn aıtty. Sondaı-aq B.Tólegen atalǵan kompanııa jumysyndaǵy taǵy bir úlken kemshilik retinde basshylar men jumysshylar arasynda dıalogtiń joqtyǵyn jáne jumysshylar qoıǵan suraqqa der kezinde jaýap berý, birinshi basshy blogyn turaqty júrgizý máseleleriniń aqsap turǵandyǵyn atap ótti.
«2022 jyly ujymmen eseptik kezdesýler ótkizilgen joq, 2023 jyly josparlanǵan 16 kezdesýdiń tek ekeýi ǵana ótkizilgen. Birinshi basshynyń blogi sońǵy ret 2018 jyldyń sáýir aıynda jańartylǵan. Kompanııaǵa qarasty óndiristik qurylymdyq bólimshelerdiń basshylary ózderi basqaryp otyrǵan eńbek ujymymen sońǵy kezdesýi 2016 jyly bolǵan, osyndaı kemshilikter saldarynan aqparat keńistigindegi vakýým kompanııa týraly jalǵan nemese kompanııanyń bedelin túsiretin derektermen tolyqtyrylyp otyrdy», dedi baıandamashy.
Brıfıngte Satyp alý jáne óndiristi qamtý salasyndaǵy olqylyqtar týraly aıtyldy. Spıkerlerdiń aıtýynsha, tekserý kezinde 2023 jylǵa arnalǵan satyp alý jospary 65%-ǵa oryndalǵan, sonyń ishinde taýar pozısııalary boıynsha bar-joǵy 58% qamtyldy, ıaǵnı taýar usynystarynyń 42%-y boıynsha kelisimsharttar jasalmaǵan. Kelisimshart jasalǵan 61 pozısııa boıynsha oryndaý merzimi saqtalmaǵan. Tender qujattamasynyń nashar ázirlenýine baılanysty qyzmet kórsetý men jumystar boıynsha 14 satyp alý usynysy toqtatyldy. Der ýaqytynda oryndamaýdyń basty sebepteri – taýar baǵalarynyń álsiz marketıngi, tehnıkalyq qujattardyń sapasyz ázirlenýi, baqylaýdyń nashar bolýy jáne jabdyqty jasap shyǵarý úderisin sol jerge baryp baqylaý tájirıbesiniń joqtyǵy. Sondaı-aq kelisimshart jasalyp qoıǵan pozısııalar boıynsha keshiktirip oryndaý faktileri de anyqtalǵan. Tekserý kezinde jyldyq kólemniń 36%-y ǵana oryndalǵan, keshiktirýdiń negizgi sebebi – mindetterdiń oryndalýyna baqylaýdyń joqtyǵy, mindetterin oryndamaǵany úshin kelisimshartty buzý jaǵdaılary tirkelmegen.
Jýrnalıstermen júzdesýde Jumys tobynyń jetekshisi D.Hasanov О́MG-niń óndiristik úrdisin tekserý qorytyndylaryna, onyń ishinde kólikpen qamtý jáne uńǵymalardy jerasty jóndeý máselelerine toqtaldy. Atap aıtqanda, jumys ornynan ýaqytynan buryn ketý jáne kólikti garajǵa erte ótkizý faktileri anyqtalǵan. Birqatar basqarmada 2023 jyldyń 4 aıynda shamamen jumys ýaqytynyń 170 000 saǵaty oryndalmaǵan, óndiristen tys shyǵys mólsheri shamamen 1,2 mlrd teńgeni quraǵan. Burǵylaý jumystary basqarmasynda 205 avtokóliktiń 199-yna GPS-treker ornatylǵan, alaıda olardyń tek 70-i jumys istep tur.
«Sonymen qatar, uńǵymalardy jerasty jóndeý jumystary barysynda tehnologııalyq reglamenttiń saqtalmaýy baıqalady. Uńǵymalardy jerasty jóndeý brıgadasy jospardy oryndaý úshin kenjardy jýý/ tazartý jáne uńǵymalardy sapaly sóndirý sekildi negizgi jumystardy sırek atqarǵan. Odan bólek, uńǵymalardyń toqtap qalýyna jol bermeý úshin jóndeýaralyq kezeńde profılaktıkalyq jáne reanımasııalyq jumystar oryndalmaıdy. Jóndeý brıgadalary qabyldaý kópirleri, preventorlar, sharly krandar, gıdrokiltter, spaıderlermen durys qamtylmaǵan. Munyń barlyǵy uńǵymalardyń beriktigi men qaýipsizdigine áser etedi.
Qoryta kele aıtarymyz, jumys toby aýqymdy, keshendi jumys atqardy. Anyqtalǵan birqatar buzýshylyq boıynsha materıaldar quqyq qorǵaý organdaryna jiberildi. Qazir naqty baǵyttar boıynsha kemshilikterdi joıý maqsatynda jospar ázirlenip jatyr. Olardyń keıbiri tereń júıelik sıpatta bolady. Olardy sheshý úshin, birinshiden, ýaqyt, ekinshiden, qosymsha qarjy qajet. Sondyqtan bul jumysty aldaǵy birneshe jylda «О́zenmunaıgazben» birlese otyryp atqaramyz», dedi QMG basqarma tóraǵasynyń orynbasary D.Hasanov.
Tekserý nátıjesi tek kinálilerdi jazalaýmen ǵana shektelmeı, keleshekte kıkiljińderdiń oryn almaýyna negiz bolsa deımiz. Qordalanǵan másele qashanda túsinispeýshilik pen qarama-qaıshylyq týyndatady, demek kompanııaǵa júrgizilgen tekserý nátıjesinde qabyldanatyn is-sharalar osy olqylyqtardyń ornyn toltyryp, kemshilikterdi túzetse ıgi.
Mańǵystaý oblysy
