Olımpıada kúni aıasynda London Olımpıadasynyń chempıony Serik Sápıev, 2016 jylǵy Rıoda uıymdastyrylǵan Olımpııa oıyndarynyń kúmis júldegeri Vasılıı Levıt jáne bokstan álem jáne Azııa chempıony Mereı Aqshalov jas sportshylarǵa sheberlik sabaqtaryn ótkizdi.
«Barsha qazaqstandyqtardy Halyqaralyq Olımpıada kúnimen quttyqtaımyn! Osyndaı is-sharaǵa qatysyp otyrǵanyma qýanyshtymyn. Jas sportshylardyń olımpıadalyq sportqa qyzyǵýshylyq tanytyp, chempıon bolýǵa umtylǵanyn, elimizdiń chempıondarymen kezdeskisi keletinin kórý – biz úshin úlken qýanysh. Meniń oıymsha, óskeleń urpaq jyl ótken saıyn sportqa bet buryp kele jatqany da qýantady. «Ustazdan shákirt ozar» degendeı, jas sportshylardyń bizden ozyp, júzden júırik atanýy úshin barymyzdy salamyz! Mereke qutty bolsyn!», dedi Serik Sápıev.
Sonymen qatar jas sportshylar olımpıadalyq sport túrlerine arnalǵan vıktorınaǵa, «kóńildi starttar» estafetasyna qatysyp, óz baqtaryn synap kórdi. Árqaısysy óz bilimi men daǵdylaryn kórsetip, Qazaqstannyń Ulttyq Olımpıada komıtetiniń baǵaly syılyqtaryn utyp aldy.
«Elimizdiń barlyq turǵyndaryn Halyqaralyq Olımpıada kúnimen quttyqtaǵym keledi. Olımpıada kúni – jyl saıyn toılanatyn ıgi dástúr. Osyndaı is-sharalarǵa qatysqan uldar men qyzdar chempıon bolýdy jáne jeńis tuǵyrynan Qazaqstan týyn jelbiretýdi armandaıdy. О́skeleń urpaqqa degen senimim mol jáne olardyń ata-analaryna balasynyń tańdaýyna qurmetpen qaraǵany úshin rızashylyǵymdy aıtqym keledi. Vıktorınalarǵa belsendi qatysqan balalardyń bilimge degen qushtarlyǵyna tántimin. Qazaqstanda sport qarqyndy damyp keledi, bul qýanarlyq jaǵdaı!», dedi Vasılıı Levıt.
Ulttyq Olımpıada komıteti Halyqaralyq Olımpıada kúnin 30 jyl boıy ótkizip keledi.
