UFC prezıdenti Dana Ýaıttyń aıtýynsha, Shavqat Rahmonov 16 qyrkúıek kúni Meksıkanyń táýelsizdigi kúnine oraı AQSh-tyń Las-Vegas qalasyndaǵy T-Mobile arenada uıymdastyrylatyn aralas jekpe-jek keshinde segizburyshqa kóteriledi. Ol UFC týrnırinde amerıkalyq Kelvın Gastelýmmen aıqasady. Bul jekpe-jek osy keshtiń eń negizgi jekpe-jeginiń biri bolady dep josparlanyp otyr. 31 jastaǵy Gastelým 2010 jyldan beri aralas jekpe-jekpen shuǵyldanady. Osy ýaqytqa deıin ol 26 márte oktagonǵa shyǵyp, sonyń 17-sinde jeńiske jetken. Segiz aıqasynda qarsylasyna jol bergen bolsa, bir kezdesýi esepke alynbaǵan. UFC-diń orta salmaqtaǵy reıtınginde 12-satyǵa jaıǵasqan.
Kelvın eń keıingi kezdesýin osy jyldyń sáýir aıynda amerıkalyq Krıs Kıortıspen ótkizip, tóreshilerdiń sheshimi boıynsha jeńiske jetken. Sonymen qatar sol keshtiń eń úzdik faıteri atanǵan. Al «Nomad» laqap atymen álemge tanylǵan 28 jastaǵy Shavqat Rahmonov naýryz aıynda ótken aıqasynda amerıkalyq Djeff Nılden basym túsken bolatyn.
