Sportty damytý dıreksııasynyń málimetinshe, qol doby boıynsha básekeler sheshýshi týrǵa deıin tartysty ótken. Máselen, sońǵy týr aldynda birden 3 komanda – Qaraǵandy, Aqtóbe men Shymkent gandbolshylary bas júldeden dámeli boldy. Besinshi týrda jarys qojaıyndary Astana qalasynyń komandasymen sheberlik baıqasyp, 38:30 nátıjesimen jeńiske jetti. Sóıtip, kenshiler komandasy upaı sanyn 8-ge jetkizse, Shymkent qalasynyń komandasy Aqtóbe oblysymen ótken asa tartysty matchta 33:22 esebimen basym túsip, olar da 8 upaıdan jınady. Jarys sońynda tóreshiler jeńimpaz ben júldegerlerdi dop aıyrmashylyǵy boıynsha anyqtady. Bes týrda eń kóp gol soǵyp, óz qaqpasyna az gol ótkizgen Qaraǵandy oblysynyń komandasy spartakıada jeńimpazy atansa (57-53), Shymkent qalasy kúmis (56-55), Aqtóbe oblysy (51-56) qola medalǵa ıe boldy.
«Osydan tórt jyl burynǵy V jazǵy spartakıada da Qaraǵandy qalasynda ótken bolatyn. Sol kezde 4 komandanyń arasynda (Qaraǵandy, Astana, Pavlodar men Atyraý) kenshiler qalasynyń ókilderi chempıon atanǵan. Astana qalasy kúmis, Pavlodar oblysy qola medal alǵan. Bıylǵy jarystyń deńgeıi kóterilgen. Sońǵy týrda 3 komanda birdeı upaı jınap, teń túsýi sonyń kórsetkishi», dedi Astana qalasy komandasynyń bapkeri Vladımır Berezın.
Nebári eki oıynda jeńiske jetken elordalyqtar bul joly 4-orynmen shekteldi. Jazǵy spartakıadaǵa qatysyp jatqan jańa oblystyń biri Almaty – 5-shi, al Mańǵystaý oblysy 6-satydan kórindi.
«Biz búgin qola medaldy mise tuttyq. Qalaǵanymyz bas júlde edi. Búgin Shymkent qalasymen nashar oınadyq. Ásirese alǵashqy aınalymda. Tym kóp gol ótkizip alǵan soń aıyrmashylyq kóbeıip ketti. Nege bulaı bolǵanyn bilmeımin. Demek, áli daıyndyqty kúsheıtip, taǵy jumys isteý kerek. Endi ulttyq quramamen Azııa oıyndaryna daıyndyq kútip tur. Quramanyń jýyrda jasaqtalǵanyna qaramastan, jaqsy nátıje kórsetýge barymyzdy salamyz», dedi ulttyq qurama qaqpashysy Asylhan Nabıev.
Qazaqstan erler quramasy alda Qytaıdaǵy Azııa oıyndary men Qatar astanasynda ótetin Parıj Olımpıadasynyń irikteý týrnırine qatysady.
