Magomed Adıev jattyqtyratyn Qazaqstan ulttyq quramasy ótken aıda eki oıyn ótkizip, ekeýinde de jeńiske jetken bolatyn. Atap aıtqanda, Eýro-2024 irikteý kezeńi aıasynda ótken syrt alańdaǵy matchtyń alǵashqysynda San-Marıno fýtbolshylaryn 3:0 esebimen tize búktirgen bolsa, araǵa úsh kún salyp Belfastta Soltústik Irlandııa quramasyn (1:0) qapy qaldyrǵan bolatyn. Osy jeńisiniń arqasynda ulttyq qurama FIFA reıtınginde 8 satyǵa kóterilip, 1198.24 upaımen 104-orynǵa jaıǵasty. Munyń aldyndaǵy reıtıngte jerlesterimiz 112-satyda turǵan edi.
Reıtıngtiń alǵashqy úshtigi ózgerissiz qaldy. Ádettegideı 2022 jylǵy álem chempıony – Argentına 1843.73 upaımen kósh bastap tursa, Fransııa (1843.54) – ekinshi, Brazılııa (1828.27) úshinshi ornyn saqtap qaldy. Al Eýro-2024 irikteý kezeńindegi qarsylastarymyzdyń reıtıngine toqtalar bolsaq, Danııa (1597.37) – 19, Fınlıandııa (1419.19) – 54, Slovenııa (1391.04) – 60, Soltústik Irlandııa (1361.17) – 64 jáne San-Marıno (753.11) eń sońǵy 211-orynda tur.
