Úkimet basshysy búginde daıyndyq jumystarynyń barysynda óte muqııat qaraýdy qajet etetin problemalyq máseleler týyndap jatqanyn aıtty. Atap aıtqanda, birqatar obekt boıynsha jóndeý jumystary merziminen keshigip jatyr.
«Bul máseleni biz jaqynda ótken Úkimet otyrysynda talqyladyq. Degenmen ózara úılesimdi, birlesken is-qımyldy budan da kúsheıtý qajet. Sondyqtan osy jumystardyń barlyǵyn taǵy da muqııat qarap, tikeleı sheshim qabyldaımyz», dedi Álıhan Smaıylov.
Energetıka mınıstri Almasadam Sátqalıev respýblıkanyń birqatar óńiriniń jylý kózderindegi problemalyq máseleler týraly egjeı-tegjeıli baıandady, al ındýstrııa jáne ınfraqurylymdyq damý vıse-mınıstri Dınara Sheglova jylýmen jabdyqtaý jelilerin jóndeý barysy týraly aıtyp berdi.
Premer-mınıstr «Atyraý JEO» AQ-da №12 týrbına ótken jyldan beri jóndeýde turǵanyn, al №6 týrbınada kúrdeli jóndeý jumystary áli bastalmaǵanyn atap kórsetti. Atyraý oblysynyń ákimi Serik Shápkenov osy másele boıynsha túsinikteme berdi.
Oǵan qosa Qaraǵandy oblysyndaǵy JEO-da jóndeý jumystarynyń túrleri ózgerip, merzimderi uzartylsa, Mańǵystaý oblysynda jekelegen qazandyqtar men týrbınalarda júrgizilip jatqan jumystardyń keshigip jatqany, sondaı-aq «MAEK» JShS-niń №2 energetıkalyq blogyn jóndeýge kelisim-shart jasalmaǵany, Ulytaý oblysy Jezqazǵan JEO-syndaǵy qazandyqty jóndeý 2024 jylǵa shegerilgeni jáne №8 qazandyqty kúrdeli jóndeý merzimderin aýystyrýǵa baılanysty tıisti rezerv qamtamasyz etilmegeni aıtyldy. О́ńirler ákimderi Ermaǵanbet Bólekpaev, Nurlan Noǵaev jáne Berik Ábdiǵalıuly qabyldanyp jatqan sharalar týraly túsinikteme berdi.
Sonymen qatar Úkimet basshysy SQO-da «Sevkazenergo» AQ-nyń 2-shi JEO-syndaǵy №9 qazandyqqa jóndeý júrgizilip jatqanyn, al Túrkistan oblysynda Kentaý JEO-synyń 4 qazandyǵyn kúrdeli jóndeý josparlanǵanyn, alaıda bul rette JSQ áli de memlekettik saraptamadan ótý satysynda ekenin atap ótti. О́z kezeginde Aıdarbek Saparov pen Darhan Satybaldy kóterilgen máseleler boıynsha túsinikteme berdi.
Otyrys barysynda Astana ákimi Jeńis Qasymbek pen Jambyl oblysynyń ákimi Nurjan Nurjigitov sóz sóıledi.
Qorytyndylaı kele, Premer-mınıstr jylý berý maýsymyna daıyndyq máseleleri úlken áleýmettik mańyzǵa ıe ekenin atap ótti, sondyqtan qazirden bastap iri apattardyń aldyn alyp, jylytý maýsymynyń turaqty ótýi úshin qajetti sharalardy qabyldaý qajet.
«Atap aıtqanda, JEO jáne jeliler ıelerimen tikeleı, tyǵyz jumys isteý mańyzdy. Memleket tarapynan stansııalardyń ótinimderine sáıkes tarıfter bekitildi. Bul qarjylandyrýdy tartýǵa jáne jańǵyrtý jumystaryn bastaýǵa múmkindik beredi», dedi Álıhan Smaıylov.
Sondaı-aq Úkimet basshysy energetıka salasyn baqylaýdy kúsheıtýdiń jáne tıisti óńirlik shtabtar jumysynyń mańyzyn atap ótti.
Keńes sońynda Úkimet basshysy birinshi vıse-premer Roman Sklıarǵa jáne energetıka mınıstri Almasadam Sátqalıevke kestege sáıkes júrgizilip jatqan jumystardyń barysyn jeke baqylaý úshin respýblıkanyń energetıkalyq nysandaryn tekserýdi tapsyrdy.
«Roman Vasılevıch, búginde siz keste boıynsha Pavlodar oblysynyń energetıkalyq nysandaryn, onyń ishinde Ekibastuz JEO-syn tekserýińiz kerek. Keńes aıaqtalǵannan keıin tez arada jolǵa shyǵýyńyzdy suraımyn. Kelesi aptada Almasadam Maıdanuly Rıdder jáne Kentaý JEO-laryna barady», dep túıindedi Premer-mınıstr.
