«Qazaqstan barysy» týrnıriniń bıylǵy fınaldyq kezeńine qatysqan balýandar sany buǵan deıingi jarystarǵa qaraǵanda rekordtyq nátıjege jetti. Iаǵnı bıylǵy dodada elimizdiń túkpir-túkpirinen kelgen 41 balýan bas júlde úshin beldesti. Fınaldyq kezeńge joldama alǵan balýandardyń esimderi belgili bolǵan kezde-aq qazaq kúresiniń maıtalman mamandary «Qazaqstan barysy-2023» týrnıriniń basty favorıtteriniń biri retinde Ǵalymjan Qyryqbaı ekenin erekshe atap ótken bolatyn. О́ıtkeni jambyldyq jampoz osyǵan deıingi týrnırlerde qatarynan eki márte júldegerler sanatynan kórinip, qola jáne kúmis belbeýdi qanjyǵasyna baılaǵan edi. Atap aıtqanda, 2021 jylǵy fınalda Shyǵys Qazaqstan oblysynyń balýany Dáýren Nuralınovke ese jibergen bolsa, byltyr jartylaı fınalda qyzylordalyq Maqsat Isaǵabylovtan jeńilip qalǵan-dy. Úshinshi oryn úshin ótken beldesýde Nursát Temirhanmen kezdesýi kerek edi, alaıda qarsylasy jaraqatyna baılanysty bozkilemge shyǵa almady. Sóıtip, Ǵalymjan Qyryqbaı avtomatty túrde qola júldeger atandy.
Bıylǵy básekede de Ǵalymjan Qyryqbaı myqtylyǵyn dáleldep, óz karerasynda ekinshi márte jarystyń fınalyna alqynbaı jetti. Ony fınaldyq básekede byltyrǵy týrnırdiń kúmis júldegeri mańǵystaýlyq Nurdáýlet Jarylǵapov qasqaıyp kútip turǵan edi. Qos myqty arasyndaǵy kezdesýdiń negizgi kezeńinde balýandardyń kúshi teń túsip, jeńimpazdyń esimi qosymsha ýaqytta anyqtaldy. Bir mınýtqa eseptelgen beldesýdiń 9-sekýndynda Ǵalymjan Qyryqbaı qarsylasynyń jaýyrynyn jer ıisketip, «Qazaqstan barysy» atandy. Sondaı-aq ol jarys uıymdastyrýshylary tarapynan «Altyn belbeý» men 25 mıllıon teńge aqshalaı júldemen marapattaldy. Al Nurdáýlet Jarylǵapov osymen ekinshi ret fınalda ese jiberip, «Kúmis belbeý» men 5,5 mıllıon teńge aldy.
Týrnırdiń qola júldesi Pavlodar oblysynyń ókili Muhtar Dálelhanulyna buıyrdy. Ol úshinshi oryn úshin ótken básekede taǵy bir «Ásker barysy» jeńimpazy Marat Baıqamurovtan basym tústi. Pavlodar oblysynan kelgen balýanǵa «Qola belbeý» jáne júlde retinde 1,8 mıllıon teńge tabystaldy.
