«Elimizde Ádiletti Qazaqstan qurý úshin aýqymdy ınstıtýsıonaldyq ózgerister júzege asyrylyp jatqany barshańyzǵa málim. Mańyzdy saıası reformalar júrgizildi. Azamattardyń memlekettik, ásirese, jergilikti jerde sheshimder qabyldaýǵa qatysý múmkindigi edáýir keńeıdi. Elimizdegi qala turǵyndary endi ózderi syılaıtyn ári senetin depýtattardy tańdaý múmkindigine ıe boldy. Bul jaýapkershiligi mol azamat qaǵıdattaryn ornyqtyrýǵa eleýli úles qosady. Adamdardyń óz qalasyndaǵy turmys-tirshilikti jaqsartý isine yqpal etýge múmkindik beredi», dedi Memleket basshysy.
Sonymen qatar Prezıdent qoǵamnyń qundylyqtar júıesi jańǵyrmaı, barlyq reformamyzdyń máni bolmaıtynyn aıtty. Sondaı-aq Qasym-Jomart Kemeluly jastarǵa úlken senim artatynyn jasyrmady.
«Astana – jas ári maqsaty asqaq qala. Ulan-baıtaq elimizdiń ár aımaǵynan kelgen azamattarymyz qalada turaqtap qalýǵa tyrysady. Talaı jastyń elordada baǵy ashyldy, olar ómirden óz ornyn tapty. Búginde Astana – mol múmkindikter qalasy. Munda árbir azamat óz áleýetin paıdalanyp, mansap jolynda jetistikke jetip, óziniń arman-maqsatyn júzege asyra alady.
Astana – ózgeristerdiń qaınaǵan ortasy, túbegeıli jańǵyrýlardyń asyl dińgegi. Bul jerde jalpyulttyq biregeıligimizdiń jańa qyrlary men ulttyń jańa sapasy qalyptasady», dedi Prezıdent.
