Bıyl elordalyq ujymnyń Eýrokýbok básekelerine úzdiksiz qatysyp kele jatqanyna týra 10 jyl toldy. Eń alǵash Eýrododa oıyndaryn 2013-2014 jylǵy Eýropa lıgasynyń irikteý kezeńinen bastap, alǵashqy umtylysynda-aq sátsizdikke ushyrasa da, «Astana» klýby keıinnen bir márte Chempıondar lıgasynyń, tórt ret Eýropa lıgasynyń toptyq kezeńinde baq synady. Osy ýaqyt aralyǵynda elordaǵa aǵylshynnyń «Manchester Iýnaıted», Ispanııanyń «Atletıko Madrıd», Fransııanyń «Renn», Ýkraınanyń «Dınamo», «Kıev», Portýgalııanyń «Sportıng» jáne Eýropanyń taǵy basqa da azýly komandalary keldi. Osy komandalarmen ótken oıyndardyń kóbinde «Astana» klýby qarsylastarynan basym túsip, «Astana Arenaǵa» jınalǵan fýtbol jankúıerlerin qýanysh pen shattyqqa bólegen edi.
«Astananyń» sol kezdegi tabystaryna óz úlesin qosyp, bapkerlik quramda bolǵan Grıgorıı Babaıan byltyrdan bastap komanda tizginin qolyna alyp, elordalyq ujymdy qaıtadan bıikke shyǵarýdy maqsat etip otyr.
Statıstıkalyq málimetterge kóz júgirter bolsaq, elordalyq ujym keıingi on jyldyń ishinde Eýrokýbok básekeleriniń tek bir maýsymyn teń nátıjemen bastap, Eýropa lıgasynyń toptyq kezeńine deıin shyqqan eken. Endi, mine, araǵa jeti jyl salyp, «Astana» taǵy da halyqaralyq oıyndardyń alǵashqysynda teń túsip otyr. Muny da bir jaqsylyqqa balaǵan durys shyǵar.
27 myń jankúıer tamashalaǵan «Astana Arenadaǵy» matchtyń aıqyn favorıti «Astana» bolǵany daýsyz edi. О́ıtkeni grýzııalyq ujym óz eliniń dańqty komandasy bolsa da, halyqaralyq oıyndarda asa tájirıbesi joq. Sondyqtan match bastalmaı turyp-aq fýtbol mamandary bul kezdesýde «Astananyń» jeńiske jetýine esh kúmán keltirmeıtinin málimdegen bolatyn. Tipti elordalyq klýbtyń ańyz oıynshysyna aınalǵan serbııalyq qaqpashy Nenad Erıch te «Astana» jeńisine senimdi bolǵan.
Biraq 90 mınýt boıy tartysty ótken kezdesýde komandalardyń kúshteri teń túsip, tosyn nátıje tirkeldi. Birinshi taımda elordalyq komanda oıyn tizginin óz qolyna alyp, qarsylastaryna qaraǵanda basym bolsa, ekinshi taımda Grýzııa komandasy shabýylda sátti oınady. Kezdesýdiń alǵashqy mınýtynda jerlesterimiz «Dınamo» qaqpasyna birneshe qaýipti shabýyl uıymdastyryp, tek 10-mınýtta ǵana gol soǵý baqyty buıyrdy. «Astana» quramyn jýyrda ǵana tolyqtyrǵan ulttyq qurama oıynshysy Iаn Vorogovskııdiń pasynan keıin Abat Aıymbetov dopty qaqpaǵa dál baǵyttap, kezdesýdiń esebin ashty – 1:0. Birinshi taımnyń sońyna deıin «Astana» fýtbolshylary esepti eseleýge tyrysqanymen, qarsylas klýbtyń qorǵaýshylary shabýylshylarymyzǵa múmkindik bermedi.
Ekinshi taımda da jerlesterimiz oıyndaǵy basymdyqty óz qoldaryna alyp, dınamolyqtarǵa qysym kórsetýge tyrysty. Biraq jasandy alańǵa boı úıretken «Dınamo» fýtbolshylary ekinshi 45 mınýttyqta «Astana» qaqpasyna jıi shabýyldady. Nátıjesinde, oıynnyń 57-mınýtynda grýzııalyqtardyń kezekti shabýyldarynyń birinde Gabrıel Sıgýa bos qaqpany dál kózdep, mergendigimen kózge tústi – 1:1. Oıynnyń qalǵan ýaqytynda «Astana» fýtbolshylary tablodaǵy kórsetkishti ózgertkisi kelgenimen, ekinshi goldy soǵýǵa shamalary jetpedi. Sóıtip «Astana» men «Dınamo» arasyndaǵy alǵashqy oıyn teń nátıjemen aıaqtalyp, barlyq másele Grýzııadaǵy oıynda sheshiletin boldy. Eki ujym arasyndaǵy qarymta match 19 shildede Tbılısıde ótedi.
