Eýrokýbok oıyndarynyń tarıhyna kóz júgirtsek, Fınlıandııa komandalary – Qazaqstan klýbtaryna eń yńǵaısyz qarsylas. Máselen, elimizdiń jeti dúrkin chempıony «Astana» búginge deıin skandınavııalyq ujym ókilderimen ótken eki oıynnyń birinde jeńiske jetip, ekinshisinde jeńilip qalǵan bolatyn. Chempıondar lıgasynyń 2015-2016 jylǵy maýsymynyń úshinshi kezeńinde «Astana» Fınlıandııanyń azýly ujymy HIK klýbymen kezdesip, eki oıynnyń nátıjesi boıynsha 4:3 esebimen kelesi kezeńge ótse, eki jyl buryn KýPS klýbyna 4:5 esebimen jol bergen edi.
Irgetasy 1957 jyly qalanǵan «Honka» komandasy Eýrokýbok básekelerinde tájirıbeli klýb sanalmasa da, Qostanaıda ótken oıynda alań qojaıyndaryn ábden ábigerge saldy. Byltyr óz elderiniń chempıonatynda qola júlde ıelengen eki ujym arasyndaǵy kezdesýdi «Tobyl» fýtbolshylary belsendi bastaǵanymen, alǵashqy goldy qonaq komandanyń oıynshylary soǵyp ketti.
Birinshi taımnyń 39-mınýtynda Lýkas Kaýfmannyń alys baǵyttaǵan soqqysynyń aldynda «Tobyl» komandasynyń qorǵaýshylary da, qaqpashysy da dármensizdik tanytyp, gol ótkizip aldy. Sóıtip, «Honka» fýtbolshylary úziliske kóterińki kóńil kúıde attandy. Degenmen alǵashqy 45 mınýtta «Tobyl» fýtbolshylary qarsylastaryna qaraǵanda qaýipti shabýyldy kóp uıymdastyrǵanymen, birde-bir múmkindikterin golǵa aınaldyra almady.
Úzilis ýaqytynda bas bapker Mılıch Chýrchıchten qajetti aqyl-keńesti tyńdap shyqqan alań ıeleri ekinshi taımdy óte qaryndy bastap, qarsylastarynyń qaqpasyna jaýapsyz eki gol soǵyp, tamasha kambek jasady. Aldymen oıynnyń 62-mınýtynda shabýylshy Mılıan Výkadınovıch «Honka» qaqpasynyń alys buryshyn dál kózdep, tarazy basyn teńestirdi. Soǵylǵan goldan keıin Qostanaıdaǵy ortalyq stadıonǵa jınalǵan jankúıerler de, «Tobyl» fýtbolshylary da rýhtanyp, shabýyldaryn eki ese kúsheıtti. Nátıjesinde, ekinshi gol da kóp kúttirgen joq. Matchtyń 75-mınýtynda «Honka» klýbynyń qorǵaýshylary men qaqpashysy óz aıyp alańynda pas almasý kezinde bir-birin túsinbeı, doptan aıyrylyp qaldy. Urymtal tusty Mılıan Výkadınovıch sátti paıdalanyp, dýbldiń avtory atandy. Osylaısha, eki ujym arasyndaǵy alǵashqy kezdesý 2:1 esebimen qostanaılyqtardyń paıdasyna aıaqtaldy.
«Tobyl» men «Honka» arasyndaǵy qarymta match 20 shildede Fınlıandııada ótedi. Eger jaýap básekesinde jerlesterimiz jeńiske jetip nemese teń nátıjege qol jetkizetin bolsa, Konferensııa lıgasynyń ekinshi aınalymyna joldama alady. Al bul kezeńde «Tobyl» Shveısarııanyń «Bazel» klýbymen kezdesýi múmkin.
Sondaı-aq Konferensııa lıgasynyń ekinshi irikteý kezeńinde byltyrǵy el chempıonatynyń kúmis júldegeri «Aqtóbe» men Qazaqstan kýboginiń ıegeri «Ordabasy» klýbtary óner kórsetedi. Shymkenttik ujym 27 shildede óz alańynda Varshavanyń «Legııasyn» qabyldasa, «Aqtóbe» «Torpedo» (Kýtaısı) – «Saraevo» (Bosnııa jáne Gersegovına) jubynyń jeńimpazymen kezdesedi.
