Birer jyldan beri dástúrge aınalǵan bıylǵy boks shoýyna halyqaralyq jarystarda el namysyn abyroımen qorǵap júrgen áıelder jáne erler quramyndaǵy úsh birdeı otandasymyz shaqyrtý aldy. Atap aıtar bolsaq, 2016 jylǵy áıelder arasyndaǵy álem chempıony, 2022 jáne 2023 jylǵy jahandyq dodanyń qola júldegeri, 2021 jylǵy Azııa chempıony jáne el chempıonatynyń birneshe dúrkin jeńimpazy Valentına Halzova, erler arasyndaǵy halyqaralyq jarystar men el birinshiliginiń júldegeri Muhamedsabyr Bazarbaıuly jáne jýyrda ǵana Tashkentte ótken álem chempıonatynyń kúmis júldegeri Dýlat Bekbaýov Phýket sharshy alańynda judyryqtasty.
Jekpe-jekter ádettegi jarystardan erekshelenip, jartylaı kásipqoı formatynda uıymdastyryldy. Iаǵnı erler 3 mınýttan 5 raýnd, áıelder 2 mınýttan 5 raýnd judyryqtasty. Sonymen qatar áıel boksshylar «Chempıondar keshinde» alǵash ret shlemsiz óner kórsetkenin de aıta ketken jón.
Taıland sharshy alańyndaǵy boks keshiniń shymyldyǵyn áıel boksshylar ashyp, Valentına Halzova eki dúrkin Eýropa chempıony, álem birinshiliginiń bes dúrkin júldegeri túrkııalyq Elıf Gıýnermen qolǵap túıistirdi. Buǵan deıin 71 kılo salmaqta judyryqtasqan eki boksshy bul joly 75 kıloda ózara kim myqtyny anyqtady. Álemdik jarystarda ábden ysylyp, tájirıbesi tolysqan jerlesimiz birinshi mınýttan bastap kezdesý tizginin óz qolyna alyp, túrik boksshysynyń adymyn ashtyrmady. Qarsylasynyń qorǵanysyn sát saıyn buzyp, dál soqqylardy kóp jasap otyrdy. Jekpe-jek qorytyndysynda otandasymyz tóreshilerdiń biraýyzdan qabyldaǵan sheshimimen jeńiske jetti. Halzova men Gıýner bıyl Úndistannyń Nıý-Delı qalasynda ótken álem chempıonatynyń shırek fınalynda kezdesip, sol kezde de Valentınanyń mereıi ústem bolǵan edi.
Erler arasyndaǵy jekpe-jekter keshin otandastarymyzdan 63,5 kıloǵa deıingi salmaqta judyryqtasatyn Muhammedsabyr Bazarbaıuly bastap berdi. Ol bıylǵy álem chempıonatynyń qatysýshysy ózbekstandyq Mýdjıbıllo Tursynovpen kúsh synasty. Muhammedsabyrdan ózge boksshynyń barlyǵy bul boks keshine bir aı buryn shaqyrtý alǵan bolsa, jerlesimiz uıymdastyrýshylardan jarysqa birer kún qalǵanda ǵana usynys alǵanyn aıta ketken jón. Odan bólek, Bazarbaıuly shilde aıynyń basynda Astanadaǵy «Elorda kýbogine» de qatysqan edi. Jarysqa daıyndyǵy az bolǵanyna qaramastan, otandasymyz ózbek boksshymen bolǵan aıqasta esh qaımyǵyp qalǵan joq. Degenmen asa tartysty ótken kezdesýde tóreshiler ózbek boksshynyń qolyn kóterdi.
Qazaq-ózbek teketiresiniń ekinshi jubynda Tashkenttegi álem chempıonatynyń fınalynda judyryqtasqan Dýlat Bekbaýov pen Asadhýdja Mýıdýnhýdjaev jankúıerlerge qyzyqty jekpe-jek usyna bildi. О́kinishke qaraı, 71 kılo salmaqta ótken kezdesý de ózbek boksshynyń paıdasyna sheshildi. Bul – Bekbaýov pen Mýıdýnhýdjaev arasyndaǵy keıingi eki jyl ishindegi úshinshi jekpe-jek. Birinshi ret eki boksshy byltyrǵy Azııa chempıonatynyń jartylaı fınalynda kezdesip, sol aıqasta jerlesimizdiń baǵy janǵan bolatyn. Al keıingi eki básekede ózbek boksshysy myqtylyq tanytty.
«Chempıondar keshindegi» ózge de jekpe-jekterge toqtalar bolsaq, áýesqoı boksta barlyq ataqqa qol jetkizgen Olımpıada, álem jáne Azııa chempıony ózbekstandyq Hasanboı Dýsmatov álem chempıonatynyń qola júldegeri ıspanııalyq Martın Molınadan basym tússe, Tokıo Olımpıadasynyń júldegeri reseılik Imam Hataev eki dúrkin Olımpıada chempıony kýbalyq Arlen Lopesti jeńip ketti. Al boks keshiniń basty jekpe-jeginde 5 dúrkin álem chempıony jáne eki dúrkin Olımpııa oıyndarynyń jeńimpazy kýbalyq Hýlıo La Krýz ıspanııalyq Enmanýel Reıesten aılasyn asyrdy.
Osylaısha, «Chempıondar keshiniń» jeńimpazdary Halyqaralyq boks qaýymdastyǵy tarapynan chempıondyq belbeý men 10 myń dollar kólemindegi syıaqymen marapattaldy. Jeńilgen boksshylar da syılyqtan quralaqan qalǵan joq, olar 5 myń dollarǵa ıe boldy.
