Ony qurý perspektıvalaryn ótken aptada Qazaqstan Premer-Mınıstriniń orynbasary – Saýda jáne ıntegrasııa mınıstri Serik Jumanǵarın jáne Simatech Shipping & Forwarding (ADP tobyna kiredi) basshysy Davýd Taftı talqylady.
Negizgi mindet – Qazaqstandaǵy Quryq portynan Parsy shyǵanaǵy elderine Ámirabad jáne Bender-Abbas (Iran) porttary arqyly aýyl sharýashylyǵy taýarlaryn jetkizý. Jańa baǵyt otandyq eksporttaýshylarǵa buryn-sońdy bolmaǵan múmkindikter ashpaq: úsh kúnde Iran arqyly Ámirabad, Bender-Abbas, Bender-Homeını, Chabahar porttaryna, BAÁ-lik Halıfa, Fýdjeıraǵa jáne ári qaraı Úndistan, Pákistan, Qıyr Shyǵys, Afrıkanyń shyǵys jaǵalaýyndaǵy barlyq portqa jol ashady. Bul rette basqa taýarlardy eýropa elderine jetkizý múmkindigi de qarastyrylýda.
Kezdesý barysynda taraptar ári qaraı Parsy shyǵanaǵy elderine tranzıt jasaýǵa múmkindik beretin Kaspıı teńizi arqyly Iran Islam Respýblıkasyna júkterdi jetkizý marshrýttarynyń nusqalaryn talqylady. Simatech Shipping & Forwarding kompanııasynyń CEO-sy Davýd Taftıdiń aıtýynsha, kompanııa árqaısysy 7 500 tonna júk kóteretin 4 keme satyp alǵan. Kemelerdiń sýdaǵy tereńdigi – 6 metr, olar úıindi, konteınerlik, sondaı-aq negizgi júkterdi tasymaldaýǵa qabiletti. Qazirgi ýaqytta kemeler – Ámirabad portynda (Irannyń Behshar okrýginiń soltústiginde) ornalasqan. Aldaǵy 2 jyl ishinde kompanııa osyndaı 10 kemeni jetkizýdi josparlap otyr. Sondaı-aq jaqynda kompanııa 45 júk kóligin jáne árqaısysy 350 júk kóligin tasymaldaýǵa qabiletti eki barjany satyp aldy. Aldaǵy 4 aıǵa arnalǵan josparda júk avtoparkiniń sanyn 200-ge deıin, bolashaqta 1 000-ǵa deıin jetkizý tur.
Quryq (Qazaqstan) jáne Halıfa (BAÁ) bazalyq porttar bolady. Bul eki port barlyq qajetti ınfraqurylymmen jáne tehnıkamen qamtylady. Sondaı-aq kompanııanyń júkterdi biriktirý jáne qaıta jınaý úshin eki qurǵaq porty bar. Munyń bári qazaqstandyq eksporttaýshylarǵa Irannan 2-3 kúnde ótýge múmkindik beredi.
Eske sala keteıik, 2023 jylǵy sáýir aıynda Premer-Mınıstrdiń Iranǵa sapary barysynda Quryq pen Ámirabad porttary arasyndaǵy tasymaldardy damytý týraly kelisimge qol qoıyldy. Qol jetkizilgen ýaǵdalastyqtardy iske asyrý aıasynda osy porttarda astyq termınaldary úshin ınfraqurylym salý jumystary aıaqtalýda.
Simatech Shipping & Forwarding – Parsy shyǵanaǵyndaǵy jetekshi keme basqarýshy kompanııa. Onyń úlken floty bar, Irannan arab elderine, Úndistan, Afrıka jáne Qytaıǵa júk tasymaldaýmen aınalysady. Kompanııanyń arab elderinde birqatar kommersııalyq porty men termınaly bar.
