– El Úkimetiniń memlekettik bilim berý uıymdarynyń memlekettik ataýly áleýmettik kómek alýǵa quqyǵy bar otbasylardan, sondaı-aq memlekettik ataýly áleýmettik kómek almaıtyn, jan basyna shaqqandaǵy tabysy eń tómengi kúnkóris deńgeıiniń shamasynan tómen otbasylardan shyqqan bilim alýshylary men tárbıelenýshilerine jáne jetim balalarǵa, ata-anasynyń qamqorlyǵynsyz qalyp, otbasylarda turatyn balalarǵa, tótenshe jaǵdaılardyń saldarynan shuǵyl járdemdi talap etetin otbasylardan shyqqan balalarǵa jáne ózge de sanattaǵy bilim alýshylar men tárbıelenýshilerge qarjylaı jáne materıaldyq kómek kórsetýge bólinetin qarajatty qalyptastyrý, jumsaý baǵyty men olardy esepke alý qaǵıdalaryn bekitý týraly qaýlysyna sáıkes, 2023 jylǵa áleýmettik qorǵalmaǵan otbasylardan shyqqan 52 305 oqýshyny mektep formasymen jáne keńse kerek-jaraqtarymen qamtamasyz etý úshin 2,1 mlrd teńge bólingen. Ár balaǵa 40 567 teńgeden keledi. Búgingi tańda 1 178 oqýshynyń ata-anasynyń jeke esep shotyna ár balaǵa 40 567 teńgeden qarajat aýdaryldy. Qalǵan 51 127 oqýshynyń ata-anasynyń jeke esep shotyna tamyz aıynyń 15-ne deıin qarajat aýdarylatyn bolady, – dedi Almaty oblystyq bilim basqarmasynyń basshysy S.Bespaeva.
Balalardy mektep formasymen jáne oqýǵa qajetti keńse taýarlarymen tolyq qamtamasyz etý maqsatynda osy jylǵy tamyzdyń 12-i kúni Esik qalasynda, 19 tamyzda Talǵar qalasynda otandyq taýar óndirýshilerdiń qatysýymen mektep jármeńkeleri uıymdastyrylady.
– Jańa oqý jylynda 7 balam Talǵar qalasyndaǵy Abaı atyndaǵy №3 orta mektepke barady. Onyń barlyǵyn kerek-jaraqpen qamtamasyz etýge shamamyzdyń kelmesi anyq. Sol sebepti Úkimettiń jáne qaıyrymdy azamattardyń kómegine júginýge týra keledi. О́ıtkeni baǵa sharyqtap tur. Aıaqkıim baǵasy 20 myń teńgeden joǵary bolmasa, tómen emes. Sanap beretin qalam-dápterdiń de bir toqsanǵa jetkiliksiz. Byltyr bıýdjetten ár balaǵa 37 myń teńgeden bólingen. Ony sabaqqa kirýge bir kún qalǵanda qolymyzǵa alǵanbyz. Bıylǵa qujat ótkizdik, tamyzdyń 15-ine deıin túsedi dep ýáde berdi. Buǵan da shúkirshilik etemiz, – degen 12 balanyń anasy Gúlnaz Otynbekovanyń mektep jasyndaǵy jeti balasynyń úlkeni 11-synypqa barsa, úıdegi onynshy bala, ıaǵnı 7 jasar Ámına 1-synyptyń tabaldyryǵyn attaıdy.
Jalpy, jańa oqý jylynda Almaty oblysy boıynsha 1-synypqa 38 700 baldyrǵandy mektepke qabyldaý josparlanyp otyr. Byltyr 37 015 bala mektep tabaldyryǵyn alǵash attaǵan bolatyn.
