Dál osy kúni jylǵalarynan kópten beri jańbyr sýy aqpaǵan Qaraǵandyda nóser jaýyn quıdy. Uly aqynnyń týǵan kúninde tabıǵat-ananyń syıy osy boldy. Aspannan nur quıyldy, jerde jyr oqyldy. Dala sahnasyna jınalǵan jurt jańbyrdyń astynda qalsa da, keshti ábden tamashalap baryp tarqasty.
Keshtiń shymyldyǵyn aqyn, Jazýshylar odaǵy oblystyq fılıalynyń tóraǵasy Janat Jańqashuly ashty. Turǵyndardy merekemen quttyqtap, hakimge arnaǵan óleńin oqydy.
«Abaı – adamzattyń aqyny. Abaı – Alashtyń úni. Shyǵarmalarynda qazaqtyń bar muńyn, qaıǵysyn aıtyp ketken. Hakimniń týyndylaryna úńilip, qazaqtyń uly halyq ekenine kóziń jetedi. Qazaqtyń sóz ónerin shyńǵa shyǵarǵan uly tulǵa. Barshańyzdy hakimniń týǵan kúnimen shyn júrekten quttyqtaımyn», dedi ol.
Odan keıin dástúrli ánniń dúldúlderi Saıan Bódesov, Qýandyq Tókenov bastaǵan ánshiler Abaı ánderin oryndady. Talantty ánshi Araılym Júkenova da estradalyq janrda «Kózimniń qarasyn» shyrqady. Sultan Dáýlethan, Erik Naryn, Elmıra Saılaý, Saltanat Qaıyrbek syndy aqyndar óz shyǵarmashylyǵynan óleń oqydy.
«Abaı dúnıege kelgen kún – qazaq poezııasy men tutas ádebıetiniń hám dúnıetanymynyń merekesi. Sol mereke kúni Qaraǵandy ortalyq saıabaǵynda nóserlep jańbyr quıdy, dúrkirep án men jyr tógildi. О́leń oqyp qaıtyp bara jatqanda, óleńiń týraly jyly lebiz estý, tipti, ǵajap. Dástúrli túrde ótip kele jatqan, dalamyzdy dýmanǵa bóleıtin osyndaı ıgi is-sharaǵa qatysqanyma qýanyshtymyn», dedi Saltanat Qaıyrbek.
Uly oıshyldyń qarasózderi de umyt qalmady. Respýblıkalyq, oblystyq, qalalyq baıqaýlarda júlde alyp júrgen Bektas Juman men Mádı Bıjan hakimniń qarasózderin sheber oqydy. «Sahnaǵa suranyp, Abaıdyń óleńin jatqa oqyǵan kórermender de boldy. Bul ádebı-sazdy keshtiń óz maqsatyna jetkendigin kórsetti», deıdi uıymdastyrýshylar.
Igi is-sharany Jazýshylar odaǵynyń Qaraǵandy oblystyq fılıaly qalalyq ákimdiktiń qoldaýymen uıymdastyrdy. Jaz boıy ortalyq saıabaqta «Qaraǵandy – qara óleń» atty ádebı-sazdy keshter ótip júr. Bul kesh burynǵy keshterden ózgerek, árıne.
Qasymhan ǴALYM,
«Egemen Qazaqstan»
Qaraǵandy oblysy
