Búgin Ulytaý oblysynda «Qazaqmys korporasııasy» JShS-niń 100-ge jýyq kenshisi eńbek jaǵdaıyn jaqsartý, qural-jabdyqtardy jańartý, syıaqy tóleý jáne medısınalyq saqtandyrý sharttaryn qaıta qaraýdy talap etip, ereýilge shyqqany týraly aqparat tarady. Kenshiler tarapy 15 talap qoıǵany belgili boldy.
Korporasııa ókilderi aqparatty rastap, oqıǵanyń anyq-qanyǵy jaıly resmı derek usyndy.
Aıta ketsek, shahtadaǵy jumys ýaqytsha toqtatylǵan.
«2023 jyldyń 14 tamyzynda túngi aýysymǵa túsken Sátbaev óndiristik alańynyń №65 shahtasynyń kenshileri men merdigerlik uıymdarynyń qyzmetkerleri jumystyń toqtatylǵanyn habarlady. Oqıǵa ornyna «Qazaqmys» basshylyǵy, prokýratýra, jergilikti atqarýshy bılik ókilderi attandy. Qazirgi ýaqytta korporasııa basshylyǵy týyndaǵan máselelerdi sheshý úshin shahterlerdiń bastamashyl tobymen kelissózder júrgizip jatyr. Aımaqtyq jedel shtab quryldy», delingen habarlamada.
