Mekeme kóp, maman tapshy

Emhanada 800 kelýshige ar­nalǵan dıagnostıkalyq or­ta­lyq ornalasady. Al 96 tósektik orynǵa laıyqtalǵan kóp­beıindi reabılıtasııalyq orta­lyqta fızıoterapııa, onkologııa, kardıologııa, ınsýlt ortalyǵy, jaraqat bólimsheleri ashylady. Jańa 200 jumys orny ashylady, onyń 50-i – beıindi dárigerler. Medısınalyq ortalyq eki jyl­dyń ishinde salynady. Klınıka zamanaýı úlgidegi medısınalyq jabdyqtarmen tolyq qamta­masyz etiledi. Sondaı-aq Mem­leket basshysynyń tapsyrmasymen Saryaǵashta respýblıkalyq bıýdjet esebinen perınataldy ortalyǵy bar kópsalaly medısınalyq keshen salynyp jatyr. 10 gektar jerde boı kóteretin keshende perzenthana, kópsalaly aýrýhana, emhana jáne ákimshilik ǵımarat ornalasady. Al Túrkistan qalasynda salynyp jatqan 570 tósektik oryndy kópbeıindi aýrýhana qurylysy jyl sońyna deıin aıaqtalyp, el ıgiligine paıdalanýǵa berilmek.

Sonymen qatar oblys orta­lyǵynda oblystyq balalar aýrýhanasynyń jáne «Ana men bala» ortalyǵynyń da ǵı­ma­rattaryn salý josparlanyp otyr. О́tken jyldyń ózinde oblysta «Deni saý ult – árbir azamat úshin sapaly jáne qoljetimdi densaýlyq saqtaý» ulttyq jobasy aıasynda aýyldyq eldi mekenderde medısınalyq pýnkter men dári­gerlik ambýlatorııalarmen qamtý maqsatynda 29 aýylda 31 densaýlyq saqtaý nysanynyń qurylysy júrgizildi. Onyń 17-siniń qurylysy josparǵa sáıkes aıaqtalyp, el ıgiligine paıdalanýǵa berildi. Shardara aýdanynda táýligine 150 adam qabyldaýǵa qaýqarly, qura­mynda jedel járdem stansasy bar, qurylysy aıaqtalǵan qalalyq emhana qoldanysqa berildi. «Aýyl – El besigi» baǵ­dar­lamasy aıasynda byltyr Túlkibas aýdany Sastóbe kentindegi 75 kelýshige arnalǵan dárigerlik ambýlatorııa quryly­sy tolyq aıaqtalyp paıdalanýǵa tapsyryldy. Taǵy 4 dárigerlik ambýlatorııanyń qurylysy júrgiziledi. Byltyr 5 nysan kúrdeli jóndeýden ótse, bıyl taǵy 2 nysanǵa jóndeý júr­gi­ziledi. Oblysta 2024 jylǵa qa­raı – Jetisaı, Saryaǵash, Saı­ram jáne Ordabasy aýdan­da­rynda tórt jańa kóp­beıin­­di aýdanaralyq aýrýhana qury­lady. Bular kórshi aýdan­dar­dyń turǵyndaryna da qyz­met etedi. Jyl sońyna deıin qu­ry­lysy aıaqtalyp, paıdala­nýǵa beriletin Túrkistan oblys­tyq kópbeıindi aýrýhanasy Sozaq, Otyrar jáne Saýran aýdandarynyń turǵyndary úshin osy fýnksııalardy oryndaıdy. Aýdanaralyq aýrýhanalardy iske qosý Shymkent pen Túrkistandaǵy medısınalyq mekemelerdiń júktemelerin birshama azaıtýǵa múmkindik beredi. Iаǵnı densaýlyq salasyna qoldaý kórsetýdiń ná­tıjesinde medısınalyq mekemeler qatary arta túsken. Árıne, bul baǵyttaǵy memlekettik saıa­­­­sat­ty halyq qoldap, jasal­ǵan qo­laıly jaǵdaılarǵa rıza­shy­lyǵyn bildirip jatyr. Alaı­da osy salynyp jatqan, paı­dalanýǵa berilgen mekemelerde, alynyp jatqan zamanaýı qural-jab­dyqtardy meńgergen sapaly qyz­met atqaratyn maman tapshy.

Túrkistan oblysynda, ásire­se beıindi mamandar arasynda 258 maman, anestezıolog-reanımatolog, oftalmolog, lor, kardıohırýrg, travmatolog, kardıolog, nevropatolog, nefrolog, onkolog, patologoana­tom, radıolog, neonatolog, je­del járdem dárigeri sekildi kadrlar jetispeıdi. Onyń bir­den-bir sebebin oblystyq den­saýlyq saqtaý basqarmasy rezıdentýrada oqytý merziminiń uzaqtyǵymen baılanystyrady. Bul oraıda, ıaǵnı tapshylyqty joıý maqsatynda bıyl jergi­likti bıýdjet esebinen birinshi ret 60 grant bólingen.

Túrkistan oblysy