Memleket basshysy atap ótkendeı, úılesimdi tulǵa men jaýapty azamatty qalyptastyrý negizderi balalyq shaqta qalanady. Eldegi árbir balanyń baqytty jáne qaýipsiz balalyq shaǵy bolýy kerek.
Sondaı-aq Joldaýda óskeleń urpaqtyń psıhıkalyq densaýlyǵy máselesi de kóterildi. DDU málimetteri boıynsha, psıhıkalyq densaýlyqtyń buzylýy 10-19 jas aralyǵyndaǵy adamdar arasyndaǵy barlyq jahandyq aýrýlar men jaraqattardyń 16 paıyzyn quraıdy.
Psıhıkadaǵy kinárattar negizinen 14 jasqa deıin paıda bolady, biraq mundaı jaǵdaılar kóbinese anyqtalmaıdy jáne emsiz qalady. Jasóspirim kezdegi psıhıkalyq densaýlyqtyń buzylýyn elemeý eresek jasta jalǵasatyn, fızıkalyq jáne psıhıkalyq densaýlyqqa teris áser etetin, sondaı-aq tolyq eresek ómir súrý múmkindikterin shekteıtin saldarǵa ákelýi múmkin.
2021 jyly 3 298 respondentti qamtyǵan áleýmettik zertteý júrgizgen edik. Zertteý nátıjelerine sáıkes árbir 5-shi qazaqstandyq jasóspirim býllıngtiń qurbany nemese qatysýshysy bolady. Mektepte býllıngke ushyraǵan balalar basqa balalarǵa qaraǵanda ózderin eki ese jalǵyz sezinedi, túnde uıyqtaı almaıdy jáne sabaqqa qatyspaıdy.
Prezıdenttiń bilim berý mekemelerinde psıhologııalyq qoldaý qyzmetin kúsheıtý, biryńǵaı senim telefonyn uıymdastyrý jáne zorlyq-zombylyq pen býllıng qurbandaryna kómek kórsetýdiń pármendi baǵdarlamasyn ázirleý sekildi bul salaǵa naqty tapsyrmalar bergenine óte qýanyshtymyz.
Dınara SÁDÝAQASOVA,
Respýblıkalyq «Jas Ulan» biryńǵaı balalar men jasóspirimder uıymynyń tóraǵasy
