Máýlen Áshimbaev erekshe qajettilikteri bar azamattardy qoldaý jáne kedergisiz orta qalyptastyrý elimizdiń aldynda turǵan negizgi mindetterdiń biri ekenin atap ótti.
«Memleket basshysy ınklıýzıvti damý máselelerine árdaıym basa mán berip keledi. Ádiletti Qazaqstan degenimiz de barshaǵa teń múmkindik jasaýǵa taban tireıtini anyq. Osy rette bochchadan ótip jatqan osyndaı saıystar Qazaqstanda ınklıýzıvti qoǵam qurýǵa óz úlesin qosyp otyr dep aıtýǵa tolyq negiz bar. Aldaǵy ýaqytta da bárimiz birlesip, úlken nátıjelerge qol jetkizemiz dep senemin», dedi M.Áshimbaev.
Sonymen qatar Senat spıkeri elimizde atalǵan sport túriniń qolǵa alynǵanyna kóp ýaqyt ótpese de, aıtarlyqtaı nátıjelerge qol jetkizip úlgergenin tilge tıek etti. Sondaı-aq ol ınklıýzıvti qoǵamdy damytý úshin osy qarqyndy joǵaltpaı tıisti jumysty jalǵastyrýdyń mańyzdylyǵyna jáne bul baǵytta Senat zańnamalyq deńgeıde qajetti qoldaý kórsetýge daıyn ekenine nazar aýdardy.
«Qazirgi tańda elimiz boıynsha 20-dan astam bochcha úıirmesi jumys isteıdi. Ol jerlerde 150-ge jýyq erekshe qajettiligi bar sportshy jattyǵady. Bıyl biz ulttyq quramamyzdy jasaqtadyq. Qurama halyqaralyq jarystarda elimizdiń namysyn qorǵaıdy. Sportshylarymyzdyń iri saıystarǵa qatysýynyń ózi úlken jetistik. Sondaı-aq bul – ár adamnyń óz múmkindikterin iske asyrýyna jol ashatyn tolyq ınklıýzıvti qoǵam qurý isindegi mańyzdy qadam», dedi M.Áshimbaev.
