Oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa bıylǵy 4 maýsymda bolǵan. Jylyoı aýdanyndaǵy Turǵyzba aýylynan bir otbasy Jem ózenine shomylýǵa barǵan. Shomylý kezinde 13 jasar Ernaz jaǵalaýdan alysqa uzap, shuńqyrǵa batyp ketken. Inisiniń jan ushyra aıqaılaǵan daýysyn estigen aǵasy Eldos birden kómektesýge umtylady. Alaıda inisin qutqarýǵa tyrysqanymen, ózi de bata bastaǵan.
Al jaǵalaýda turǵan apaly-sińlili Aısana, Dana jáne Merýert bir-biriniń qolynan ustap, sýǵa batqan baýyrlaryna kómektesýge talpynady. Biraq alda kele jatqan Aısananyń aıaǵy qurysyp, baýyrlaryn qutqarýǵa jete almaǵan. Sol sebepten, Aısana aıqaılap, kómekke shaqyrǵan. Onyń daýysyn kilem jýyp jatqan áıeline kómektesip júrgen Manarbek Qartbaev estigen. Ol jaǵalaýǵa jedel jetip, ózenge batqandardy qutqarý úshin sýǵa sekirgen.
«Manarbek Qartbaev aldymen sýǵa batqan Ernazdy, keıin Eldosty alyp shyqty. Keıin úsh qyzdyń jaǵalaýǵa jetýine kómegin berdi. Jedel áreket etken Manarbek Jaımanuly osylaısha bir otbasyndaǵy eki adamnyń ómirin saqtap qaldy. Oǵan Tótenshe jaǵdaılar mınıstrliginiń «Sýǵa batqandardy qutqarǵany úshin» medali tapsyryldy», dep málim etti departamenttiń qoǵammen baılanys tobynan.
Atyraý oblysy
