Kezdesýde taraptar ekonomıkalyq yntymaqtastyqty odan ári nyǵaıtý men tereńdetýdiń perspektıvalyq baǵyttaryn, sondaı-aq Qazaqstan Respýblıkasynda júzege asyrylyp jatqan birlesken ınvestısııalyq jobalardy talqylady.
Roman Sklıar Qazaqstan ınvestısııalyq ahýaldy jaqsartýǵa erekshe kóńil bóletinin atap ótti. Ol Germanııany Qazaqstannyń Eýropalyq Odaqtaǵy eń mańyzdy seriktesteriniń biri dep atap, energetıka, ónerkásip, kólik jáne logıstıka sııaqty basym salalardaǵy yntymaqtastyqty odan ári tereńdetýge múddelilik tanytty.
О́z kezeginde Folker Traıer Qazaqstan Germanııa úshin Ortalyq Azııadaǵy basty seriktes ekenin atap ótti. Germanııa statıstıkasyna sáıkes, elder arasyndaǵy saýda 2022 jyly 90,2% artyp, jalpy somasy 9,7 mlrd eýroǵa jetti. Qazaqstannyń Germanııaǵa eksporty da 86,5% ósip, 6,9 mlrd eýrony qurady.
Folker Traıer elderdiń ekonomıkalyq yntymaqtastyqty keńeıtý jáne tereńdetý úshin úlken áleýeti bar ekenin atap ótti.
Sondaı-aq Premer-mınıstrdiń birinshi orynbasary «KAZAKH INVEST» UK» AQ qoldaýymen Germanııa ekonomıkasynyń Ortalyq Azııadaǵy ókildigimen Germanııanyń Saýda-ónerkásip palatasy uıymdastyrǵan Qazaqstan-Germanııa bıznes forýmyna qatysty.
Forým aıasynda iskerlik baılanystardy odan ári damytý men keńeıtý jáne ekijaqty saýdany ilgeriletý perspektıvalary men múmkindikteri, sondaı-aq Qazaqstan men Germanııa arasyndaǵy naqty birlesken jobalar talqylandy.
Forýmǵa Qazaqstandaǵy memlekettik organdar men jeke bıznes ókilderi, sondaı-aq Germanııa ekonomıkasynyń 40-tan astam jetekshi ókilderi qatysty.
