Foto: Túrkistan oblysy ákiminiń baspasóz qyzmeti
Bıyl «Kongress holl» kópsalaly keshenine qosymsha mádenıet qyzmetkerlerine 100 shtat birligi berilgen bolatyn. Jańa jumys oryndaryna mamandar alý úshin arnaıy habarlamalar berilip, áleýmettik jelilerde taratyldy. Sondaı-aq Astana, Almaty qalalaryna ókilder jiberilip, óner mamandaryn daıarlaıtyn joǵary oqý oryndarynda aqparattyq, túsindirme jumystary júrgizildi. Nátıjesinde arnaıy kastıng jarııalanyp, alǵashqy irikteýge Qazaqstannyń ár óńirinen ótinishter túsken.
«Túrkistan – barshaǵa ortaq qala. Atynyń ózi túrki elderiniń mádenı-rýhanı astanasy bolýǵa laıyq ekenin bildiredi. Qoja Ahmet Iаsaýı kesenesi de – talaı týrıstiń kelýine basty sebep. Endi oblystyń mádenıeti de jandanyp, osy oraıda ata-babalarymyzdan qalǵan dástúr men ulttyq qundylyqty saqtap qalýymyz kerek. Ulttyq bolmysymyz mádenıetimiz arqyly kórinis tabýy tıis. Shetel týrısterin ózimizdiń bolmysymyzben, ónerimizben qyzyqtyra alamyz. Túrkistanda syrttan kelgen qonaqtar qyzyǵatyndaı, erekshe stıli bar, óz óner ujymy qalyptassa degen oımen osy bastamany qolǵa alyp otyrmyz. О́ner men mádenıette Túrkistannyń óz brendi qalyptasýy qajet», degen Darhan Satybaldy jańa óner ujymynyń repertýaryn baıytý, tyń ıdeıalardy júzege asyrý jolynda daıyndyǵyn kúsheıtýdi tapsyrdy.
Oblystyq mádenıet jáne týrızm basqarmasynyń basshysy Ázimhan Qoılybaev osy baǵytta bekitilgen arnaıy josparǵa sáıkes qazirgi tańdaǵy shyǵarmashylyq ujymdardy qalyptastyrý jumystary týraly baıandady. Rýhanııat ordasyna Almaty, Shymkent, Qaraǵandy, Taraz, Qyzylorda, Petropavl qalalary men Túrkistan oblysynyń aýdandarynan 80-ge jýyq túrli óner ıeleri kelip, óz baqtaryn synap, baıqaýdan soń 54 jas maman iriktelip alynǵan. Búginde jańa ujymmen prodıýser, rejısser, ssenarıst, telejúrgizýshi Serjan Moldasanuly tyǵyz jumys istep jatyr.
«Bastapqyda ýaıym boldy, táýekel ettim. Irikteýden ótken jastar óte talantty. Mundaǵy talanttar birin-biri izdep kelgendeı. О́nerpazdardyń arasynan vokaldyq, klassıkalyq, dástúrli ánshiler men ulttyq aspaptar orkestri jáne bı ujymy jasaqtalyp jatyr. 25 qazan – Respýblıka kúni qarsańynda óner kórsetemiz dep josparlap otyrmyz. Jigitter talantty, birneshe aspapta oınaı alady. Erekshe jańalyǵymyz, Túrkistan týraly mıýzıkl jazyp jatyrmyz. Nátıjesin alda kóre jatarsyzdar. Eń bastysy jınaqtalǵan óner ujymyn osy aımaqqa sińirip, talaptaryn ashý – mindetimiz», dedi prodıýsser.
Mýzykant, Qazaqstannyń Eńbek sińirgen qaıratkeri Nurǵısa Dáýeshov Túrkistannyń mádenı tynysy ózge oblystardan kósh ilgeri ekenin tilge tıek etti.
«Úsh jyl qatarynan ótip jatqan «Túrkistan daýysy-2023» respýblıkalyq jas oryndaýshylar baıqaýy Túrkistannyń brendi desek bolady. Deńgeıi joǵary. Elimizdiń ózge óńirlerinde mundaı respýblıkalyq án dodasy joqtyń qasy. Al endi shtat ashý máselesiniń qanshalyqty qıyn ekenin jaqsy bilemin. Bul oblysta jumys júıege qoıylǵandyǵyn kórsetedi. Oqý bitirip jatqan talanttar kóp, al jumys orny jetispeıdi. Jalpy óner ujymynyń damýyna kıim, baspana máselesimen qatar, elimizge jáne shetelge gastroldik saparlar shabyt beredi. Sáttilik tileımin», dedi ol.
Ánshi, Qazaqstannyń eńbek sińirgen qaıratkeri Meırambek Bespaev Túrkistandaǵy osyndaı jańalyqqa qýanǵanyn jetkizip, birqatar usynysyn bildirdi.
«Altynbek Qorazbaev aǵamyz bir kezderi bárimizdiń basymyzdy osylaı qosyp edi, bul oqıǵa sol shaqty eske túsirdi. Jalpy óner ujymdaryn qoldaý óte mańyzdy. Serjan baýyrymyzdy osyǵan jetekshilik etýge kóndirdik, óıtkeni ol kóptegen iske bastamashy bolǵan isker azamat. Raıymbek Seıtmetov aǵamyz da kezinde osynda kelip, qanshama myqty shákirt tárbıeledi, teatr ashty. Jańa ujym Túrkistannyń abyroıyn asqaqtatady dep senem», degen ánshi óner ujymyn qoldaýǵa daıyn ekenin, bolashaqta birge óner kórsetetinin jetkizdi.
